महाराष्ट्रातले नामनेचे कवी, लेखक, गीतकार, परबीपत्रकांचे (ग्रीटिंग कार्ड) जल्मदाते, टिव्ही माळेंचे आनी जायरात क्षेत्रातल्यो लक्ष ओढून घेवपी वाक्यांचे (कॅचलाईन) जल्मदाते वा किंग अशे जेंका म्हणटात ते ” आनंदयात्री” अशी प्रतिमा आशिल्ले तशेच समुपदेशक आशिल्ले मुंबयचे प्रसाद कुलकर्णी हे फोंडे हांगा हिंदु सांस्कृतिक न्यास हें संस्थेन आयोजित केल्ल्या कार्यक्रमात आयले आनी आपलें काव्य, जीणेचे अणभव आनी वाणी हातून फोंडेकारांक भावनिक करून गेले. जीण जगतना कितलेय पैशे कमयले, कितलेय येस मेळयले, मळबाक हात जरी तेकले, तरी बी देव, देश आनी धर्म हांका केन्नाच विसरो नाकात, असो म्हत्वाचो संदेश प्रसाद कुलकर्णी हाणी फोंडेकारांक दिलो.
कुलकर्णी हांची मुलाखत हे वेळार नामनेचे वकील, करियर मार्गदर्शक आनी समाज सेवक आशिल्ले ॲड. शैलेश कुलकर्णी आनी सुत्रनिवेदक श्रुती हजारे हाणी घेतली. दोगय सुत्रसंचालकांक मुखेल वक्तो वा उलोवप्याक उलोवंक लावपाक त्रास घेवंचे पडलेनात कारण प्रसाद कुलकर्णी जे एकदा ओघवते शैलीत उलोवंक लागले, ते ताणी रोखडोच पुराय मंच काबीज केलो आनी हाजीर आशिल्ल्या आयकुप्यांक मंत्रमुग्ध करून सोडले. तेच भशेन एक समुपदेशक, शुभेच्छा कार्डांचे लेखक, गीतकार आनी लोकांकडेन उलयतना आयिल्लें अणभव आनी आपले जीणेतले प्रसंग सांगतना लोकांक विचारप्रवृत्त आनी विचारमग्न करून गेले.
“गारवा” हो मराठी गीतांचो अल्बम एका काळात बरोच गाजलो, ताच्यो यादी ताणी हे वेळार सांगल्यो. उमेदीन जगप ही एक वृत्ती आसा, सैमाचो आस्वाद घेवपाक कळपाक जाय, अशे ताणी म्हटलें. “जिंदगीभर यही गलती करते रहे, धुल थी चेहरेपर और आयीना साफ करते रहे” अशी शेरों शायरी आनी कवितांची उधळण करतना कुलकर्णी हाणी कार्यक्रमात रंग भरले. जगप हे खूब सुंदर आसा, आमी ते तशे जगपाक न्हयकारता. आयुष्य उमेदीन जगात, अशे प्रसाद हाणी म्हटलें.
महाभारतातलों कर्ण आनी श्रीकृष्ण हांचे भितरलो संवाद ताणी हे वेळार सांगलो. जगणेकडेन केन्नाच कागाळ करून चलना, हे कृष्णाक कळील्ले, देखून तो महाभारतालो महानायक थारलो, अशे कुलकर्णी हाणी सांगले. जगण्याकडेन आपलो दृष्टिकोन कसो आसा, ते चड म्हत्वाचे आसता, अशे मत ताणी मांडलें. मुंबय सारकिल्ले महानगरात लोकांचे अहंकार इतके टोकाक गेल्ले आसात की आपले भुरग्याक अभियंतो करचो काय दोतोर हांचे वेल्यान जोडप्यामदी घटस्फोट जावपाची परिस्थिती आयल्या, अशे ताणी उदाहरण वा देख दिवन सांगले. लोक दुःखी कित्याक जातात तर, ते मोगाचे पूल बांदचे परस अहंकाराच्यो वणती उब्यो करतात, अशे ताणी म्हटलें.
परबी पत्रकां वा शुभेच्छापत्रांची संकल्पना कशी आयली, हे सांगतना ताणी आपणेन ही संकल्पना राबोवन मनीस घडोवपाचो यत्न केलो, अशे मत मांडले. मंगेशकर भावंडातल्यो गायिका उषा मंगेशकार हांचे घरा फोन करतगीत कोणेतरी घरकाम करपी कामवाली बाई हिणेन फोन घेतला आसतलो, अशे समजून घेवन नाव विचारले उपरांत ती वट्ट गानकोकिळा लता मंगेशकार म्हूण जेन्ना कळटा, तो अणभव ताणी सांगलो. उषा मंगेशकार हाणी तांचे पयले गीत आपले आवाजात रेकॉर्ड केल्ले. सांज गारवा हो गाजलेलो अल्बम, ताच्यो यादी, शान, मिलिंद इंगळे हे गायकांबराबर केल्ली गीतां कशी बरंयली हांचो यादी ताणी सांगल्यो.
रोमँटिक गीतां, कविता, भावनिक काव्य हांचे वाचन करून ताणी वातावरण खुलयलें. सेलिब्रिटीज, राजकीं नेते कशे भितरल्यान एकटेपण आनी नैराश्याकलागून कशे पोखरलेले आसता, तांची नावां घेवन उदाहरणां दिली. अल्बम आनी सिनेमाक गीतां बरयता तेन्ना आनी कविता बरंयता तेन्ना कसो फरक पडटा, हांची उदाहरणां दिवन सांगतना हास्यांचे कारंजे उडयले. बाकीबाब बोरकार, हेर गीतकार आनी कवी तशेंच मालवणी कविता सांगून ताणी कार्यक्रमाचो बेसबरो समारोप केलो. येवकाराचे उलोवप हिंदू सांस्कृतिक न्यासचे सचिव मनोज गावकर हाणी केलें. उद्देजक उद्देश दाणी हाणी उपकार आटोवपाचे काम केले.
🖋️
(सनतकुमार फडते)
