गोंय सरकाराच्या राजभाशा संचालनालयान राज्य स्तरीय “अस्मिताय दीस” ही कार्यावळ शुक्रार ता. 16 जानेवारी 2026 दिसा सकाळीं 9.30 वरांचेर आयोजीत केल्या. ही कार्यावळ गोंय राज्य जैवविविधताय मंडळ, साळगांव, गोंय राज्य विज्ञान आनी तंत्रगिन्यान परिशद, साळगांव तशेंच नियोजन, सांख्यिकी आनी मोलावणी संचालनालय, पर्वरी हांच्या जोड पालवान आयोजीत केल्या. ही कार्यावळ पणजेच्या इन्स्टिट्यूट मिनेझीस ब्रागांझाच्या मुख्य सभाघरांत गोंयचे मानादीक मुख्यमंत्री तशेंच राजभाशा मंत्री डॉ. प्रमोद सावंत, विज्ञान, तंत्रज्ञान आनी कोयर वेवस्थापन मंत्री श्री. आतानासियो मोन्सेरात आनी हेर मानेस्तांचे हाजेरींत जातली.
ह्या सुवाळ्याक गोंयच्या पारंपारीक जिनसांक मेळिल्ल्या जीआय-टॅग अर्जदारांचो भोवमान मानादीक मुख्यमंत्र्यांचे हस्तुकीं जातलो. तशेंच, गोंयचे फुलकार, गोंयचे भाजीकार, पाडेली/रेंदेर, मीठ कामगार, नुस्तेकार, ग्रामीण वैज, पोदेर, पारंपारीक गोड तयार करपी, माडाच्या चुडटाचीं मल्लां विणपी, कट्ट्यो, काथो हांचे पासून वस्तू तयार करपी कारागीर, विशेश वेवसाय – बांबू कामगार, शेंदऱ्यो-मांद्र्यो तयार करपी, खाजेकार, शेवकार, फोवकार, चणेकार, विणकार (बनकर) अश्या पारंपरीक वेवसायीकांक ‘कौशल्य मित्र कार्ड’ भेटयतलें.
तेच प्रमाण, जीआय-टॅग प्राप्त जाल्ल्या गोंयच्या उत्पादांचें प्रदर्शन आनी विक्री ह्या वेळार जातली. गोंय राज्य जैवविविधताय मंडळाच्या GoVan उत्पादांचें प्रदर्शन आनी विक्री हे कार्यावळींत जातली. ह्या वेळार पुस्तक प्रदर्शनाचें आयोजन केलां.
उक्तावण सुवाळ्यां उपरांत कला आनी संस्कृती संचालनालय आनी गोवा कोंकणी अकादेमी आयोजीत ‘अस्मितेचीं गितां’ ही गीत-संगिताची कार्यावळ जातली. ह्या मुखेल सुवाळ्या वांगडाच, राज्यभरांत वेगळ्या वेगळ्या सुवातींचेर अनुदानीत संस्थां वरवीं अस्मिताय दिसाच्या निमतान कार्यावळी आयोजीत केल्यात. गोवा कोंकणी अकादेमी, दाल्गाद कोंकणी अकादेमी, कोंकणी भाशा मंडळ, गोंय आनी अखिल भारतीय कोंकणी परिशद ह्या संस्थां वरवीं कार्यावळी जातल्यो.
गोवा कोंकणी अकादेमी वरवीं दिव्यांग भुरग्यां खातीर चेतना एज्युकेशन सोसायटीस स्कूल फॉर स्पेशल चिल्ड्रन, कुडचडें हांगा सकाळीं 10.00 वरांचेर ‘अस्मितेचो भेसरंग’ ही कार्यावळ जातली. तशेंच सत्तरी हांगा साहित्य मंथन – सत्तरी आनी पीएम श्री सरकारी हायस्कूल, ठाणे – सत्तरी हांच्या पालवान सकाळीं 10.00 वरांचेर “अस्मिताय आनी तरणाटे” ह्या विशयाचेर उलोवपाची सर्त जातली. ताचे भायर गोंयभर विंगड विंगड कार्यावळी जातल्यो.
दाल्गाद कोंकणी अकादेमी वरवीं सकाळीं 9.30 वरांचेर सेंट थॉमस चर्च हॉल, कांसावली हांगां कोंकणी गीत-संगीत कार्यावळ आनी दनपरां 3.30 वरांचेर दाल्गाद कोंकणी अकादेमी, पणजी हांगा कविता सांज ही कार्यावळ जातली.
तशेंच, कोंकणी भाशा मंडळ, गोंय वरवीं कोंकणी भवन, मडगांवां स. 8 ते दनपरां 12 वरां मेरेन प्रस्नमाची सर्त, जाल्यार दनपरां 12 ते 1 वरां मेरेन सांस्कृतीक कार्यावळ जातली. तेच प्रमाण सांजे 4 ते 6 वरां मेरेन मडगांवच्या गोमन्त विद्या निकेतनाच्या सभाघरांत सांस्कृतीक कार्यावळीचें आयोजन केलां.
अखिल भारतीय कोंकणी परिशदेन केपें तालुक्यांतल्यां शाळा आनी उच्च माध्यमीक विद्यालयां खातीर केपें आनी कुडचडेंच्या संस्थांच्या जोड पालवान विंगड विंगड सर्ती, जागृताय कार्यावळींचें आयोजन केलां. सगल्यांनी कार्यावळीक हाजीर रावचें अशें आवाहन राजभाशा संचालनालयान केलां.
