अखिल भारतीय कोंकणी परिशदेन स्थापना दिसाची कार्यावळ आनी कोंकणी लोकांचो मेळावो, महाराष्ट्रांतल्या पुणे शारांत आयोजीत केल्या. ही कार्यावळ 13 जुलय 2025 दिसा निगडी वाठारांतल्या सिटी प्रायट शाळेच्या जोड पालवान जातली. हे कार्यावळीक गोंय सरकाराच्या राजभाशा संचालनालयान अर्थीक आदार दिला.
हे कार्यावळीक गोवा कोंकणी अकादेमीचे अध्यक्ष पूर्णानंद च्यारी मुखेल सोयरे आसतले आनी साहित्य अकादेमीचे निमंत्रक मेल्वीन रॉड्रिगीस कार्यावळीचें अध्यक्षपद सांबाळटले.
अंदूंचो माधव मंजुनाथ शानभाग यादस्तीक जिणेगौरव पुरस्कार सर्गेस्त रॉकी मिरांडा हांकां फावो जाला. उक्तावण सुवाळ्या वेळार मानेस्तांचे हस्तुकीं तांच्या घरच्यांक हो पुरस्कार प्रदान करतले. तशेंच महाराष्ट्रांत रावन खास करून पुणे वाठारांत रावन कोंकणी मळार वावर करपी कांय मानेस्तांचो ह्या वेळार भोवमान जातलो. कोशकार इजीदोर दांतास, संशोधक वामन नायक, शिक्षणतज्ञ डॉ. अश्विनी कुलकर्णी, लेखक विजयानंद गायतोंडे आनी कोंकणी वावुरपी आल्फी मोंतेरो हांचो ह्या वेळार भोवमान जातलो.
ते उपरांत भारतीय कोंकणी लोकांचो एकवट ह्या विशयाचेर भासाभास जातली आनी उपरांत गीत-संगिताची कार्यावळ आयोजीत केल्या. हे कार्यावळीक महाराष्ट्र, गोंय तशेंच कर्नाटक वाठारांतले कोंकणी लोक वांटेकार जातले.
