” आमचे शाळेची इमारत जरी ल्हान आसली तरी मनां खूब व्हड आसात” अशे उतरांनी भावनिक आदार दिवन उर्बा वाडोवपी मुख्याध्यापक अनंत अग्नी सर आनी हेर शिक्षक वर्ग लाभिल्ले कारणान हाव शिक्षणीक आनी साबार मळाचेर व्हड झेप घेवंक शकले, अशे उदगार रवींद्र केळेकार ज्ञानमंदिर शिक्षण संस्थेची विद्यार्थिनी आशिल्ल्या वृद्धी देसाई हिणे उक्तायलें. काल आयतार १६ जून २०२४ हे दिसां मडगावचे रवींद्र भवन संस्थेचे पाय तियात्रिस्त सभाघरात मडगावचें रवींद्र केळेकार ज्ञानमंदिर शिक्षण संस्थेचे वर्सुकी इनामां भेटवण सुवाळो आनी सांस्कृतिक कार्यावळ व्हडा उमेदीन आनी दबाज्यांत साजरो जालो.
यत्ता धावेचें वर्सुकी चाचणी परीक्षेत ज्ञानमंदिर शिक्षणसंस्थेत सगल्यात चड गुण मेळवपी विद्यार्थिनी म्हूण मानाचे सोयरे या नात्यान हाजीर आशिल्ल्या वृद्धी देसाय हाणी फुडें उलयतना आपल्याक शिकयल्ल्या दर एका शिक्षक आनी शिक्षिकेचे नाव घेतना तशेच मुख्याध्यापक अनंत अग्नी हांचो उल्लेख करतना हें साबार शिक्षकांनी फकत शिक्षणीक वाड जावपाकच न्हय तर चारित्र्य घडोवपाकय बी म्हत्वाचो वाटो घेतला अशे गौरवाचे उदगार काडले. शिक्षक हे फकत मार्गदर्शकच न्हय तर शिक्षणाविशी आमची आवड वाडोवपी घटक बी जावन आसा, अशे सांगतना ज्ञानमंदिर संस्थेत दर एक दिस नवे अणभव, नवी आव्हांनां आनी येस मेळोवपाच्यो नव्यो संधी तयार करपी आशिल्ले आनी जिद्द, चिकाटी वा दीर्घ यत्न करप तशेच केन्नाच हार मानप ना, हें शिकवपी आशिल्लो, अशे देसाय हाणी म्हटले. अनंत अग्नी हांचो उल्लेख करतना देसाय हाणी अग्नी सरांची दर एकल्या भुरग्याक ज्ञानमंदिराचे वाठारांत घरचे वातावरण मेळचे हे लागून आशिल्ली तळमळ, यत्न आनी दर एका भुरग्याविशीं आशिल्ली माया ही तोखणाय करपासारकी आसा, अशें म्हटले.
व्यासपीठाचेर हे वेळार मुखेल सोयरी हें नात्यान कवयित्री आनी साहित्यीक उदय भेंब्रे हांची घराकान्न किशोरी उदय भेंब्रे, रवींद्र केळेकार ज्ञानमंदिर शाळेचें मुख्याध्यापक तशेच नामनेचे कलाकार आनी सूत्रनिवेदक अनंत अग्नी, ज्ञानमंदिर शाळा वेवस्थापन समितीचे सदस्य तशेच राजकी नेते प्रशांत नायक, यश मरमंगलम आनी ज्ञानमंदिर पालक शिक्षक संघाचे अध्यक्ष अनुप मडकईकर हांचेसयत कोकणी भाशा मंडळ संस्थेच्यो अध्यक्ष अन्वेषा सिंगबाल हे मानेस्त हाजीर आशिल्ले.
प्रेक्षकांमदी कोकणी भाशा मंडळाचे आदले अध्यक्ष चेतन आचार्य, कोकणी साहित्यिक देविदास कदम हाजीर आशिल्ले. नामनेचें कोकणी साहित्यिक, वकील आनी गोंय विधानसभेचें आदले सदस्य तशेच कोकणी भाशेचें चळवळीक लागून वावुरपी ॲड. उदय भेंब्रे हांची खासा उपस्थिती वा हजेरी हें कार्यावळीक आशिल्ली. प्रशांत नायक, अन्वेष सिंगबाल हाणी आपले मनोगत उक्तायले. अनुप मडकईकर हाणी योवकाराचे उलोवप केले तर अनंत अग्नी हाणी उपकाराचे उलोवपाचे सोपस्कार पुराय केले. धावेचे विद्यार्थी हांचेसयत यत्ता ७ वी, ८ वी आनी ९ वेंचे भुरग्यांचो बी पुरस्कार भेटोवन गौरव जालो. वेगवेगळे विभागांनी धावेचें भुरग्यांचो गौरव जालो. शाळेचे वर्सुकी नियतकालिक म्हायती पुस्तिका ‘ दर्पण २०२४ ‘ हाचे उक्तावण जाले. कोकणी चळवळीक लागून जीवीत वेंचपी ॲड. उदयबाब भेंब्रे हांचे जिवीत, वावर आनी साहित्याचेर आदारीत एक खासा सांस्कृतिक कार्यावळ इनामां भेटवण सुवाळ्या उपरांत सादर जाली.
🖋
(सनतकुमार फडते)
