महाराष्ट्र राज्यांत अष्टविनायक हे आठ गणपतीं म्हटल्यार एक देशातली व्हड अशी धार्मिक देवस्थानां. या आठ गणपतींमदी एक आशिल्ल्या रांजणगाव हांगा आशिल्ल्या महागणपती या दैवताची पूजा करपाचो मान मेरशी रावपी साई घोटणे हांका मेळलेलो आसा.
सलग तीन वर्सा घोटणे हें रांजणगाव हांगा वचून महागणपतीची पूजा करतात. त्या लागून रांजणगाव हांगा वचून पूजा करपी ते पयलेच गोयकार थारलेले आसात.
गेल्या डिसेंबर म्हयन्याच्या निमाणे सप्तकांत घोटणे हाणी रांजणगाव वचून महागणपतीची पूजा केली. मेरशेचे रहिवासी आशिल्ले साई गुरुदास घोटणे हे कराटे प्रशिक्षक. २०२१ साला सावन गेली सलग तीन वर्सा ते रांजणगाव हांगा वचून महागणपतीचे दर्शन घेतात आनी पूजा करतात. २०२१ सालान ते पयले फावट रांजण गाव गेले तेन्ना ताणी आपले कराटेपटू छात्र हांका देश पावंड्या वेल्या सर्तीत यश मेळचे, अशी मनातल्यान प्रार्थना महागणपती कडेन केल्ली. २०२२ सालांत जाल्ल्या राष्ट्रीय कराटे सर्तीत तांचे भुरग्यांनी चमकदार कामगिरी करतना दोन रुप्यां पदकां आनीक दोन कांस्य वा काशे अशी चार पदकां मेळयली. महागणपतीचो हो आशीर्वादच आपल्याक मेळा, या भावनेन आपणेन या वर्सा वचून थंय पूजा केली, अशे घोटणे हाणी लाईव्ह न्यूज गोवा डॉट कॉम या वृत्त संकेत स्थळाकडेन उलयतना म्हटले.
गावचे लोक सोडले जाल्यार कोणाक मेळना संद
रांजणगाव हांगा महागणपती या दैवताची पूजा करपाचो मान फक्त गावात रावपी लोकांकूच मेळटा, अशी परंपरा आसा. गावा भायल्या खंयच्याच मनशाक थंय पूजा करपाची संद मेळना. २४ सप्टेंबर या दिसा रातचो आपुण एका कराटे छात्रासयत भायर सरलो आनी २५ डिसेंबर या दिसा रातचो थंय पावलो. २६ डिसेंबर या दिसा वट्ट फातोडेर ५ ते सकाळी ६ या वेळार आरती केली. पूजा केल्या उपरांत मानसिक समाधान आणि अध्यात्मिक शांती मेळली, अशे घोटणे हाणी सांगले.
सलग तीन वर्सा घोटणे हांचे कडल्यान पूजा: पुरोहित
रांजणगाव हांगा येवन गोयचे साई घोटणे सलग तीन वर्सा अभिषेक आनी पूजा करतात. गणपतीचे आपली खासा श्रद्धा आसा, अशे आमचेकडे सांगून ताणी देवस्थानात पूजा आनी अभिषेक करपाची मागणी आमचे कडेन केली आनी आमी ती मान्य केली. आता ते २०२१ सालातल्यान सलग तीन वर्सा हांगा येवन पूजा करतात. अशी येवन पूजा करपी ते गोय राज्यातले एकमेव मनीस आसात, अशे प्रसाद कुलकर्णी, मुख्य पुजारी, महागणपती देवस्थान- रांजणगाव, हाणी सांगले.
(सनतकुमार फडते)
