सत्तरी तालुक्यात आशिल्ले ” संवेदन केंद्र” ही गोयात कातकरी वा वानरमारे जमातीक लागून वावर करपी संस्था चलोवन सामाजिक कार्यकर्ती आनी लेखिका श्रीमती नमन सावंत धावस्कर हाणी गोंयचे सामाजिक क्षेत्रात एक आदर्श निर्माण केल्लो आसा, अशे म्हटल्यार ती अतीताय जावची ना.
लेखिका, साहित्यिक म्हूण स्वतःक अभिव्यक्त करतना तशेच समाजात घडपी बऱ्यो वायट घडणुको हांचेर आपले लेखणीचे माध्यमातल्यान भावना उक्तायतना संवेदना केंद्राच्यो संचालक म्हूण कातकरी वानरमारे सारकील्ल्या, समाजात पिछाडीचेर गेल्ल्या, फाटी पडिल्ल्या आनी उपेक्षित समुदायातल्या लोकांक आदार दिवपी सामाजिक कार्यकर्ती म्हूण नमन सावंत हांचो वावर आनी कर्तुबगारी फाटली काय वर्सा गोंयचे साहित्यिक, सांस्कृतिक आनी सामाजिक मळाचेर उजवाडाक आयला.
एक संवेदनशील लेखिका आशिल्ली नमन सावंत धावस्कर समाजात घडपी घडणुको पळोवन अस्वस्थ जावपीं आनी समाजाचे तरेतरेचे घटकांविशी आशिल्लो हुस्को तशीच अस्वस्थताय आपले लेखनातल्यान उक्तावपी एक अस्तुरी.
संवेदन केंद्रातल्यान ” प्रोजेक्ट कातकरी” हो प्रकल्प धावस्कार सावंत ह्यो प्रकल्प संचालक म्हूण चलयतात आनी गेल्या काय वर्सांच्या प्रवासात कातकरी वा ” वानरमारे ” समुदायातले लोकांक समाजाचे मुखेल प्रवाहात हाडपाचे कार्य जसजशे फुडें गेला, तशी नव्यान हे कार्यात आयिल्ली नव्या तरणाट्यांची फौज धावस्कर हांका जोडत गेल्या. हे प्रक्रियेत वानरमारे समाजातल्या लोकांची एक शिकलेले सुशिक्षित, सुसंस्कृत लोक वा मनीस जावपाचे प्रक्रियेत हळूहळू आसुयेत पुण जाल्ले सकारात्मक बदल पळोवन गोयचे समाजाक एक समाधानाची भावना दिवन वयता.
वानरमारे समाजाची वस्ती गोंयात दोन सुवातेर आसा, ती म्हटल्यार उत्तर गोंयात मालपे, पेडणे हांगा आनी दुसरी दक्षिण गोंयात निरंकाल, ओपा हांगा. संवेदन केंद्र हे ओपा हांगा कार्यरत जावन आसा तशेच संवेदन केंद्राची पुराय टीम सत्तरी तालुक्यातली जावन आसा. केंद्राचे तरणाटे कार्यकर्ते हे वाळपय, साखळे आनी केरी हे सत्तरी म्हालातल्या वेगवेगळे वाठारातल्यान, उपेक्षित आनी दुर्लक्षित समाजाविशी कणव आनी सहानुभूती घेवन आयिल्ले सक्रीय अशे, चले आनी चलीयो आसात. ही युवाशक्ती एकठाय येवन संवेदन केंद्र साखळी हे संस्थेचे नावान कातकरी समाजाक लागून आपले शक्तेप्रमाण पूर्णवेळ ना जाल्यार सुटियेच्या दिसांनी येवन तरेतरेचे उपक्रम घेतात.
फोंडे तालुक्यातले बेतोडा वाठारातले दाभाळ गावचे सामाजिक कार्यकर्ते तशेच शेती विशयांत विविध प्रयोग करपी शेतकी संशोधक डॉ. सचिन तेंडुलकर हाणी २०१३ सालचे ऑगस्ट म्हयन्यासावन त्या वाठारात रावपी वानरमारे लोकांक मजत करपाक आनी शिक्षण घेवपाक हातभार लावपाक सुरूवात केली.
२०१६ सालचे ऑक्टोबर म्हयन्यात स्थानिक लोकांकडल्यान वानरमारे समाजाचे लोकांचेर जाल्लो हल्लो आनी तांची घरां, मालमत्ता आनी हेर गजाली हांची नासधूस करपाची घडणूक घडिल्ले उपरांत वानरमारे समाजाच्यो समस्या आनी कैफियत पुराय गोयचे जनतेच्या मुखार आयल्यो. नामनेचे सामाजिक कार्यकर्ते ॲड. सतीश सोनक हाणी मानव हक्क आयोगाकडेन कागाळ करपाक जायती मजत केली. शिक्षण आनी भलायकी हे दोन मुद्द्यांचेर प्रामुख्यान संवेदन केंद्र हे वानरमारे भुरगी, दादले आनी बायलां हांचेमदी जागृताय आनी प्रोत्साहन दिवपाचें दृष्टीन मजत करता.
कातकरी लोकांच्यो समस्या, अडचणी जाणून घेवपाक ताचो अभ्यास करपाचो आनी तरेतरेचे प्रकल्प आनी शिक्षणीक तशेच जागृताय उपक्रम घेवपाक नमन सावंत हाणी ते वेळार फुडाकार घेतलो तशेच हे कामाक येवपी खर्च लक्षात घेवन ते लागून गरजेचो निधी उभारपाक ताणी काम केले. दशरथ मोरजकर, स्नेहा सबनीस, दिनेश सावंत, देवानंद गावडे, गायत्री राणे, दिक्षा गावकर, गौतमी गावस, तुलना गावस, सुनील केरकार, गौरिशा परब, समीक्षा पारोडकर आनी हेर जाणांची टीम आयज नमन सावंत धावस्कर हांका हें शिवधनुष्य पेलपाचे सामर्थ्य आनी आदार दितात.
🖋️
सनतकुमार फडते
