गोंयचे राजभाशेंत म्हणल्यार कोंकणींतल्यान राज्य माहिती आयोगान न्याय-निवाडो दिवपाच्या म्हत्वाच्या निर्णयाचें अखिल भारतीय कोंकणी परिशदेन स्वागत केलां. आनी राज्य माहिती आयुक्त आत्मराम बर्वे हांकां परबीं भेटयल्यांत. हो निर्णय राजभाशेचो प्रसार आनी प्रसार करूंक म्हत्वाचो थारतलो अशें परिशदेचे कार्याध्यक्ष चेतन आचार्य हांणी म्हणलां.
गोंय विधानसभा कोंकणींतल्यान चलता. सरकारी कामकाजांत ल्हव ल्हव कोंकणीचो वापर जावंक लागला. आतां राज्य माहिती आयुक्तान न्याय-निवाडो कोंकणींत दिल्ल्यान न्यायालयीन कामकाजांत कोंकणीचो वापर जावपाक सुरवात जाल्या ही खूब बरी गजाल अशें चेतन आचार्य हांणी मुखार सांगलें.
गोंयच्या लोकांचे भाशेंतल्यान आनी तांकां बरे तरेन समजता ते भाशेंतल्यान न्याय-निवाडो दिल्ल्यान माहिती आयुक्त आत्माराम बर्वे आनी राज्य माहिती आयोगाची तोखणाय करता तितली थोडी. आयोगान हो वावर चालू दवरचो अशी विनवणी अखिल भारतीय कोंकणी परिशदेन केल्या. सरकारी कामकाज कोंकणींतल्यान चलचें खातीर परिशदेचो सरकाराक सदांच तेंको आसतलो अशें तांणी मुखार सांगलें.
गोंयचे मानादीक मुख्यमंत्री डॉ. प्रमोद सावंत तशेंच माहिती आयुक्त आत्माराम बर्वे हांच्या पावलांचेर चलून सगळ्या सरकारी खात्यांच्या मुखेल्यांनी राजभाशा अधिनेम प्रभावीपणान चालीक लावचो अशें आवाहन परिशदेन केलां.
