केरळांतल्या कोंकणी चळवळींत मोलादीक योगदान दिल्ल्या आनंद कामत हांकां अखिल भारतीय कोंकणी परिशद आनी कोंकणी भाशा मंडळान आर्गां ओंपल्यांत. तांकां 19 जुलयाक काळजाच्या आताकान मरण आयलें.
नोव्हेंबर म्हयन्यांत केरळांतल्या कोची शारांत घडून आयिल्ल्या अखिल भारतीय साहित्य संमेलनाचे ते कार्याध्यक्ष आशिल्ले. केरळांतल्या पी. जी. कामत फांवडेशनचे ते अध्यक्ष आशिल्ले. जेश्ठ कोंकणी कवी आनी संघटक सर्गेस्त पी. जी. कामत हांचें दायज फुडें चलोवप्यां मदले आनंद कामत हे एक कोंकणीचे निश्ठावंत सेवक आशिल्ले.
केरळांत कोंकणी पुस्तकां प्रकाशीत जावचीं म्हणून ते सातत्यान वावुरल्यात. ते एक बरे आयोजक आनी संघटक आशिल्ले. कोंकणीचो प्रसार आनी प्रचार करपाक ते पोटतिडकेन वावुरताले. सदांच हांसत्या मुखामळाचे आनी क्रियाशीळ अशे कार्यकर्ते आशिल्ले. केरळांत कोंकणी भाशेच्या प्रचारा खातीर ते सदांच फुडें आसताले.
परिशदेच्या संमेलना वेळार केरळांतल्या कोंकणी मनश्यांक एकठांय हाडूंक तांचें व्हड योगदान आशिल्लें अशें अखिल भारतीय कोंकणी परिशद आनी कोंकणी भाशा मंडळ गोंय ह्या संस्थांनी काडिल्ल्या संयुक्त प्रसिद्धी पत्रकांत म्हणलां.
