राजदीप नायक हे गोयकार कलावंत आनी निर्मातो आशिल्ल्या “गाव जाला जाणटो” हे नाटकाचे एकाच दिसान सलग सात प्रयोग सादर करून गोयासयत पुराय देशात कोकणी नाटकाचो झेंडो संसाराचे मळार फडकयला.
राजदीप नायक, तांची घरकान्न आनी नाट्य लेखिका, कलाकार सुचिता नार्वेकार आनी तांचे पंगडाचे सध्याक कौतुक, अपुरबाय जायत आसा. एकाच दिसा सलग सात प्रयोग सादर करून एकाच दिसा सगल्यात चड नाटकाचे प्रयोग सादर करपाचो विश्वविक्रम हे नाटकान केल्लो आसा. वृत्तवाहिन्यो, खबरापत्रा हातूत सुरू जाल्ली तोखणाय सप्तक पुराय जायत आयले तरी चालूच आसा.
सावय वेरे हे फोंडा तालुक्यातल्या गावातली कला चेतना वळवय ही फामाद संस्था. हे संस्थेचे वतीन हे नाटक हालीच १८ मे २०२५ हे दिसा फोंडेचे राजीव कला मंदिर हांगा मास्टर दत्ताराम सभाघरात सकाळी ७.३० ते रातचे १२.३० हे वेळात न चुकता ना खंड पडनसताना सलग ७ प्रयोग करून सांसारिक मळाचेर जागतिक विक्रम करतना हे नाटकान महाराष्ट्राचे मराठी नाटक “अलबत्या गलबत्या” या बालनाट्याचो एका दिसात सलग ६ प्रयोग करपाचो विश्वविक्रम मोडून काडलो. सकाळी ७.३० चे दरम्यान दिसाचे पयले प्रयोगाची सुरूवात जाली आनी एक -एक करून सव्या प्रयोगाचे उपरांत रातचे साडे धा वराचेर सातव्या विश्वविक्रमी प्रयोगाक सुरूवात जाली.
साबार कलाकारांनी सकाळी पयले प्रयोगात दाखयल्लो जोश आनी उमेद, उत्साह निमाणे विश्वविक्रमी प्रयोगामेरेन कायम आशिल्लो. नाटकात मोहनदास नायक, राजेश लोहिया, रामानंद नायक, निगम नायक, प्रशांत च्यारी, सुचिता नार्वेकार नायक, राजदीप नायक आनी भूमी राजदीप नायक हांच्यो भूमिका आसात. दिग्दर्शक अमोघ बुडकुले हाणी नाटक बसयिल्ले आसा.
भूमी राजदीप नायक हे गोयात सगल्यात ल्हान पिरायेचे चली हे नाटकात चमकलेले आसा आनी होवूय बी गोयचे नाटकाचो एक विक्रम जावन आसा. सुचिता नार्वेकार हाणी बरयिल्ले हे नाटक विनोदी पद्धतीन मनोरंजन करतना म्हादय आनी जलसंवर्धन हे विशयांचेर भाष्य करता.
हे प्रयोगाक हाजीर आशिल्ले वर्ल्ड रेकॉर्ड बुक ऑफ इंडियाचे प्रतिनिधी संजय नार्वेकर आनी सुषमा तांबडकर नार्वेकर हांचे हस्तुकी विश्वविक्रमाचे प्रमाणपत्र राजदीप नायक आनी तांचे पंगडाक प्रदान केलो. गाव जाला जाणटो हे नाटकाचे प्रयोग गोयासयत मुंबय आनी लंडन हांगासुद्दा हाऊसफुल बोर्ड मारून घवघवीत येस मेळोवपि खेळ जाल्ले आसात.
