साहित्य अकादेमी, नवी दिल्ली हांचे वतीन गोंय विद्यापिठाची शणै गोंयबाब भाशा आनी साहित्य महाशाळा कोंकणी विभाग, गोवा कोंकणी अकादेमी आनी गोंय विद्यापिठाचो अतिथी संशोधन प्राध्यापक कार्यक्रम हांच्या जोड पालवान आयोजीत केल्ल्या ह्या राष्ट्रीय परिसंवादाचें उक्तावण आयज गोंय विद्यापिठाच्या प्रशासकीय इमारतीच्या सभागृहांत दिवली पेटोवन ह्या परिसंवादाचें औपचारीक उक्तावण जालें.
कोंकणी विभागाच्यो कार्यक्रम संचालिका कृपाली नायक हांणी उपस्थितांक येवकार दिलो. गोंय विद्यापीठ तांत्रीक आनी साहित्यीक अशा दोनूय प्रकाराच्या अणकाराक सारकेंच म्हत्व दिता आनी अनुवाद अभ्यासाक चालना दिवपा खातीर तें सतत वावुरता अशें तांणी सांगलें.
कोंकणी विभागाच्यो सहाय्यक प्राध्यापिका डॉ. रमा मुरकुंडे हांणी आपल्या प्रास्ताविकांत सांगलें की, कोंकणी, इंग्लीश, फ्रेंच आनी मराठी ह्या भाशांचे विद्यार्थी आनी प्राध्यापक, तशेंच अणकारपी आनी संशोधक ह्या परिसंवादा खातीर नोंदणीकृत जाल्यात; हाचे वयल्यान वेगळ्या वेगळ्या ज्ञानशाखां मदीं अणकारा विशीं वाडटी आवड दिसून येता.
कोंकणी समाजान आपल्या कम्फर्ट झोन आनी आत्मकेंद्री वृत्तींतल्यान भायर सरपाची गरज आसा. दर्जेदार अणकार निर्मिती खातीर समाजान एकठांय येवन खांद्याक खांद लावन काम करपाक जाय, अशें कार्यावळीचे मुखेल सोयरे गोवा कोंकणी अकादेमीचे अध्यक्ष डॉ. पूर्णानंद चारी हांणी सांगलें. तशेंच, शैक्षणिक माचयेर ज्ञानग्रंथांच्या (नॉलेज-टेक्स्ट्स) अणकाराचेर खाशेलो भर दिवचो पडटलो, अशेंय तांणी नमूद केलें.
शणै गोंयबाब भाशा आनी साहित्य महाशाळेचे उप-अधिष्ठाता (शैक्षणीक) आनी मानाचे सोयरे डॉ. हनुमंत चोपडेकार हांणी भाशा आनी साहित्य महाशाळे वरवीं चालीक लायिल्ल्या वेगळ्या वेगळ्या भाशीक उपक्रमांची आनी येवजणांची माहिती दिली.
शिक्षण सर्वसामान्यां मेरेन पावोवपाची गरज आसा, देखून ज्ञानग्रंथांचो अणकार गरजेचो आसा अशें बीजभाशण करतना गोंय विद्यापिठाच्या इंग्लीश विभागाच्यो आदल्यो मुखेली आनी प्राध्यापिका प्रा. किरण बुडकुले हांणी सांगलें. बहुभाशीकता हेंच फुडार आसा हें स्पश्ट करतना तांणी सृजनशील बरोवप, समिक्षा आनी अणकार (क्रिएटिव्ह रायटिंग, क्रिटिसिझम अँड ट्रान्सलेशन) ह्या विशयांचेर खाशेली पदव्युत्तर पदविका अभ्यासक्रम सुरू करपाची शिफारस केली.
उक्तावण सत्राचे अध्यक्ष आनी साहित्य अकादेमीच्या कोंकणी सल्लगार मंडळाचे समन्वयक मेल्विन रॉड्रिग्स हांणी अणकार प्रक्रियेंतल्या आपल्या अणभवांचेर उजवाड घालो. कन्नड काव्यांचो कोंकणींत अणकार करतना आयिल्ले अणभव तांणी सांगले. तशेंच, नवे शब्द तयार करतना पोरण्या कोंकणी साहित्याचें वाचन करून तातूंतल्या उतरांचो वापर करचो, असो सुचोवणी तांणी केली.
साहित्य अकादेमी, मुंबय कार्यालयाचे कार्यक्रम अधिकारी ओम प्रकाश नागर हांणी उपकार मानले. परिसंवादाक व्हडा संख्येन उपस्थीत राविल्ले खातीर तांणी सगळ्या सहकार्य करपी संस्थांचे, प्राध्यापकांचे आनी विद्यार्थ्यांचे उपकार मानले. उक्तावण सत्राचें सुत्रसंचालन हिंदी विभागाच्यो सहाय्यक प्राध्यापिका ममता वेर्लेकार हांणी केलें.
उक्तावण सुवाळ्या उपरांत संशोधन प्रपत्रां सादरीकरणाचीं सत्रां जालीं. हातूंत संशोधकांनी हिंदी-कोंकणी साहित्यीक अणकार, कायदेशीर अणकार, मशीन अणकार, फ्रेंच-कोंकणी अणकार, वॅबसायट लोकलायझेशन, संसदेंतलें भाशांतर, कोंकणी चित्रपटांचें सबटायटलींग आनी पत्रकारिकेंतलो अणकार अशा वेगळ्या वेगळ्या विशयांचेर प्रपत्रां जातलीं. हो परिसंवाद 9 ऑक्टोबर 2026 दिसा मेरेन चलतलो.
