गोयात पयलेच फावट आनंद, उमेद, प्रसन्नताय, संस्कृताय आनी विविधताय साजरे करपी ” खोशी लोकांचे फेस्त – धी हॅप्पी पिपल्स फेस्टीव्हल” हे फेस्ताची वा महोत्सवाची सुरूवात हालीच जाली. ‘ गोयचो फेस्ताकार ‘ म्हूण फामाद आशिल्ले मारीयस फर्नांडीस आनी तांचे साथी कलाकारांचे पंगडान हे कार्यावळीचे एक येसस्वी आयोजन गोंयचे होम सायन्स कॉलेजाचें आवारात हालीच केले.
“हॅप्पी पीपल्स फेस्टीव्हल ” हे महोत्सवाच्या ह्या शुभरंभी आवृत्तीची संकल्पना फेस्ताकार मारियास फर्नांडिस हाणी प्रत्यक्षात हाडली तर कार्यावळीचे यजमान म्हूण होम सायन्स म्हा विद्यालयात प्राचार्य डॉ. महेश पै आनी गोवा कॉलेज ऑफ होम सायन्स पणजी हे शिक्षणसंस्थेन यजमानपदाची जापसालदारकी सांबाळी.
हे फेस्ताची सुरूवात ‘फेस्ताकार पासोय’ हे गिन्यानाची देवाण घेवाण करपी चलत पासय करपाचे उपक्रमात जाली, जातूंत, म्हाविद्यालयाचे आवारात आशिल्ले करघा वा विणकाम करपी यंत्रमाग आनी कापड तयार करपी यंत्रा आशिल्ले प्रयोगशाळेचे दर्शन घडोवन हाडले. हे वेळार मिंग्यूएल ब्रागांझा, नामनेचे व्यंगचित्रकार एलेक्सीझ, ड्रॅग संस्थेचे आवेलिनो डिसा, पत्रकार निकोल सुवारेझ, विली गोएश, शेरील अफॉन्सो, लुएला डायस आनी फातिमा बार्था फर्नांडीस हाजीर आशिल्ले. प्राचार्य डॉ पै हाणी येवकाराचे उलोवप करतना फेस्ताकार फर्नांडिस हांका कुणबी शाल आनी रोपटे दिवन तांचो भोवमान केलो.
” घुमट गझाली” हे सत्रात मारियस फर्नांडीस आनी पत्रकार निकोल सुवारेस हाणी गोयचे राज्यवाद्य आशिल्ले घुमट हे वाद्याचो फुडार हाजेर चर्चा केली. ” बाल्कावाच्यो गजाली” हे सत्रात शेरिल अफान्सो आनी ग्वेंडोलिन दे ऑर्नेलास हाणी बायलांची भलायकी आनी पौष्टिक आहार हे विशयाचेर भासाभास केली. समुपदेशक लुएला डायस हांचे ” स्टुडंट फ्लॅश मॉब ” हे सत्र जाले. ताचे उपरांत पत्रकार प्रकाश कामत हांचे समाजातले सगले घटकांक सर्वसमावेशकताय आनी विविधतायेतल्यान एकठाय करपाचे खाला सामावून घेवप हे विशयाचेर मार्गदर्शन सत्र जाले. पारंपरिक दिवली नृत्य आनी ताचे उपरांत कुणबी साडी कशी न्हेसप हाचेंर डॉ. चार्लोट फाचो लॉरेन्सो हांचे मार्गदर्शन सत्र जाले, तातुंत डॉ. ग्वेंडोलिन हाणी मॉडेल म्हूण सहकार्य केले.
उपरांत बाल्कावाच्यो गजाली सत्राचे दुसरे आवृत्तीत प्राचार्य डॉ. महेश पै आनी पत्रकार प्रकाश कामत हाणी गोयात भविष्यकाळात सगले तरेचे व्यंग आनी जाती, धर्म आशिल्ले लोकांक एकठाय हाडपी सर्वसमावेशक समाज कसो उबो करतले हाजेर चर्चा केली. “गोयची नोकेत्रां” हे सत्रात म्हाविद्यालयाचो कर्मचारी वर्ग कला आनी नृत्य शैलीचे सादरीकरणात वाटेकार जालो. ” कट्ट्यांचो नाच ” हो प्रकार डॉ. ग्वेंडोलिन आनी मारीयस हाणी करून हाजीर आशिल्ल्यांक फेर धरपाक लायलो.
” 5 जी” हो पंगड म्हटल्यारच ग्लोबल गोवन गर्ल्स घुमट ग्रुप हे चलीयांचे पंगडान आपली पदां सादर केली. कुलजीत भामरा हाणी गोवा बीच हे गीत सादर करून तोखणाय मेळयली. ” लाईव्ह म्युझिक” हे सत्रात डॉ. ग्लेनिस मेंडोंसा (गिटार) आनी रेनाल्ड मेंडोंसा (व्हायोलिन) हाणी आपापली वाद्या वाजोवन भावमधुर कोकणी कांतारां सादर केली. प्रा. शेरील अफोंसो हाणी उपकार आटयले.
✒️
सनतकुमार फडते
