डॉ. राममनोहर लोहिया रिसर्च फांवडेशन, नवी दिल्लीचे वतीन डॉ. लोहियांची 54वी पुण्यतिथी मडगांवच्या रवीन्द्र भवनांत रवीन्द्र केळेकार ज्ञानमंदीर आनी 18 जून क्रांतीदीन समितीच्या पालवान घडून आयली.
ह्या कार्यावळींत, डॉ राममनोहर लोहिया हाणी 1947 वर्सा बरयिल्ल्या ‘एक्शन इन गोवा’ ह्या गोंय मुक्ती संदर्भांतलो इतिहासीक संदर्भ आशिल्ल्या पुस्तकाच्या कोंकणी, मराठी आनी हिन्दी अणकारांचें प्रकाशन जालें. ह्या वर्सा क्रांतीदीसा निमतान फांवडेशनान आयोजीत कार्यावळींत ‘एक्शन इन गोवा’ ह्या पुस्तकाच्या मूळ इंग्लीश पुनर्मुद्रीत आवृत्तीचें गोंयचे मुख्यमंत्री डॉ प्रमोद सावंत हांचे हस्तुकीं आनी विरोधी पक्ष फुडारी दिगंबर कामत हांचे हाजेरींत लोकार्पण जाल्लें.
ह्या कार्यावळीक राष्ट्र सेवा दलाचे आदले राष्ट्रीय अध्यक्ष डॉ. सुरेश खैरनार हे मुखेल सोयरे म्हूण हाजीर आशिल्ले. तांचे वांगडा माचयेर रवीन्द्र भवनाचे अध्यक्ष दामोदर नायक, कोंकणी भाशा मंडळाची अध्यक्ष अन्वेषा सिंगबाळ, डॉ. राममनोहर लोहिया रिसर्च फांवडेशन, नवी दिल्लीचे अध्यक्ष अभिशेक रंजन सींग, 18 जून क्रांतीदीन समितीचे सचीव पराग रायकार हाजीर आशिल्ले.
डॉ. लोहिया हाणी जोपाशिल्लो समाजवाद आयज ना नपयत जावंक लागला. तरणे पिळगेक लोहियांचे विचार आनी वावर हांची वळख घडोवपाची जापसालदारकी सुशिक्षीत आनी सुसंस्कृत समाजाचेर आसा अशें डॉ. खैरनार हाणी मुखेल सोयरे ह्या नात्यान उलयतना सांगलें.
ह्या वेळार कोंकणी आनी मराठी अणकारांचें अनुवादक वळेरेन दामोदर घाणेकार आनी परेश प्रभू हाणी ‘एक्शन इन गोवा’ ह्या पुस्तकाच्या खाशेलेपणांची वळख करून दिली. कार्यावळीक डॉ ज्युलियांव मिनेजीस हांचो पुतणयो रवी मिनेजीस, जेश्ट कोंकणी वावुरपी नारायण मावजो, शिक्षणतज्ञ डॉ नारायण देसाय, मुख्याध्यापक अनंत अग्नी तशेंच साबार मानेस्त हाजीर आशिल्ले.
कार्यावळीचे सुरवेक अभिशेक रंजन सींग हाणी येवकाराचें उलोवप केलें जाल्यार कोंकणी भाशा मंडळाची अध्यक्ष अन्वेषा सिंगबाळ हिणे उपकार आटयले. ब्रिजेश देसाय हाणे कार्यावळीचें सुत्रसंचालन केलें.
