कविता, नाटक, सिनेमा, पत्रकारिता, शिक्षण आनी प्रशासनाच्या मळांचेर भरीव कार्य केल्ल्या तीन दिग्गजांचे हस्तुकीं संदेश प्रभुदॅसायाच्या ‘साठ’ ह्या पयल्याच कविता संग्रहाचें प्रकाशन जातलें.
फाकिवंत कवी, पत्रकार आनी पटकथालेखक इब्राहीण अफगाण, गोंय कला अकादमीच्या नाट्यकला महाविद्यालयाचे प्राचार्य, कवी आनी नाट्यकर्मी डॉ राजय पवार तशेंच नामनेचे नाट्यलेखक, संशोधक, प्राध्यापक आनी राजभास संचालनालयाचे माजी संचालक डॉ प्रकाश वझरीकार ह्या तीन मानादिकांचे हस्तुकीं हें प्रकाशन जातलें.
हो प्रकाशन सुवाळो येता त्या आयतारा, 22 डिसेंबरा मडगांवच्या कोंकणी भवनांत चार वरांचेर जातलो. ह्या कवितासंग्रहाक इब्राहीम अफगाणान समाजविज्ञानाच्या दिश्टकोणांतल्यान कवितांचें विश्लेशण करून प्रस्तावना बरयल्या. तशेंच ह्या कवितासंग्रहांत वापरिल्ले कोंकणी साहित्यांतले वेगळे शैलीची कारणमिमांसा करपी 27 पानांचें मनोगत स्वता कवी प्रभुदॅसायान बरयलां.
तेभायर वेगवेगळ्या बोलींतल्यान प्रमाण भास कशी घडटा हाचो नियाळ घेवपी डॉ गणेश देवीचें अभ्यासपूर्ण टिपण ह्या पुस्तकाक लाबलां. डॉ देवीची देसांतले एक सर्वमान्य भाशा संशोधक, आदले इंग्लीशीचे प्राध्यापक, आदिवासी अकादमीचे संस्थापक आनी भारतीय लोकांच्या भासांचो भाशाशास्त्रीय नियाळ केल्लेखातीर नामना आसा.
हें पुस्तक छापील स्वरुपांत तशेंच ई-बूक स्वरुपांतूय प्रकाशीत जातलें आनी उपरांत ताचो ऑडियोबूकय येतलो. गोंयचे प्रकाशक क्युरेट बूक्सान हें पुस्तक प्रकाशीत केलां.
