“पीईएस म्हाविद्यालयाचे बॉटनी विभागाचे वतीन खारफुटींचेर आयोजित केल्लो कार्यक्रम हो तोखणाय करपासारको आनी देख घेवपा सारको आसा. हो आनी अशे हेर विशय घेवन आयचे पिळगेन फुडें येवपी पिळगी वाचोवपाक लागून, संशोधन क्षेत्रात वचचे” अशे मत फोंडा एज्युकेशन सोसायटीचे रवी सीताराम नायक म्हाविद्यालयाचे सचिव आनी फोंडा नगरपालिकेचे आदले अध्यक्ष रितेश नायक हाणी उलयतना उक्तायले. फर्मागुडी – फोंडे हांगा पीईएस रवी सीताराम नायक कला विज्ञान म्हाविद्यालयात रितेश नायक आनी हेर मानेस्तांचे हजेरीत “हवामान बदलात खारफुटीचे म्हत्व ” हे विशयाचेर राष्ट्रीय पावंड्यावेली परिषद जाली.
संसारीक खारफुटी दिसाचे निमतान ही दोन दिसांची राष्ट्रीय परिषद पीईएस म्हाविद्यालयाचे स्वामी विवेकानंद सभाघरात २६ जुलै आनी २७ जुलै २०२४ हे दोन दिसांनी जाली. ” हवामान बदलाचे निमतान जावपी परिणामांचे शमन आनी किनारी भागांत रावपी लोकसंख्येची शाश्वतताय आनी जीण तिगोवपाक लागून खारफुटी ” अशे शीर्षकाखालां जाल्ले हे राष्ट्रीय परिषदेत पर्यावरण आनी हवामान बदल विभाग, मॅनग्रोव्ह सोसायटी ऑफ इंडिया, गोवा राज्य जैवविविधता महामंडळ आनी गोवा राज्य प्रदूषण नियंत्रण महामंडळ ही खाती आनी महामंडळां वाटेकार जाली.
रितेश नायक हाणी फुडें उलयतना, खारफुटीचे झाडामदी म्हत्वाचे जैविक गुण आसले कारणान ही झाडां सैमाचो पर्यावरणीय समतोल सांबाळपाक मजत करतात, अशें म्हटले. अशे तरेचे म्हायतीपुर्ण कार्यक्रम आयोजित करपा फाटले म्हाविद्यालयाचे वनस्पतीशास्त्र विभागाचे मेहनतीची तोखणाय करतना ताणी विभागाची खासा तोखणाय केली. मुखेल सुवाळ्याक मुखेल सोयरे हे नात्यान हाजीर आशिल्ले ओल्ड गोवा हांगच्या ” आयसीएआर” हे राष्ट्रीय कृषी संशोधन मंडळाचे गोवा मुख्यालयाचे संचालक डॉ. परवीन कुमार हाणी हाजीर आशिल्ल्या शिक्षक आनी विद्यार्थ्यांक संबोधित करतना आपले भाषणात खारफुटीकडे संबंदित आशिल्ली काय रोचक तथ्यां, दर्यादेगेचे राखण करपासारके शाश्वत पर्यावरण प्रणाली तयार करपाक खारफुटीपसून जावपी जायते फायदे, सैमान एकठाय जावपी कार्बनडायऑक्साइड वायूचेर नियंत्रण दवरपाक खारफुटीची भूमिका आनी जैवविविधता सुधारपाचे हेतून खारफुटीचे माध्यमातल्यान उपजीविका राखप हांचेर डॉ. कुमार हाणी उजवाड घातलो. आयसीएआर ही संस्था खारफुटीचेविशी तिगोवपाची जागृताय करपाक कशे काम करता हाचो आढावो ताणी हाजीर आशिल्ल्या श्रोत्यांक लागून घेतलो.
विज्ञान परिषद गोवा हे संस्थेचे अध्यक्ष सुहास गोडसे, प्रा. संगीता साखळकर (प्राचार्य, चौगुले म्हाविद्यालय, मडगाव), डॉ. श्रीकांत (वैज्ञानिक, आयसीएआर), डॉ. त्रिवेश मयेकर (वैज्ञानिक, प्रदूषण नियंत्रण मंडळ), डॉ. मोहन गिरप, प्रकाश बाळवे (खजिनदार, पीईएस), प्रा. आय. के. पै (आदले विभाग मुखेली, प्राणीशास्त्र विभाग, गोय विद्यापीठ), शुभदा आचार्य (प्राचार्य, शिरोडा उच्च माध्यमिक विद्यालय) हे मानेस्त हे वेळार हाजीर आशिल्ले. वनस्पतीशास्त्र विभागाच्यो श्रिवेणी तारी हाणी सूत्रसंचालन केले. इतिहास विभागाच्यो प्राध्यापिका श्रीमती वर्षा कामत हाणी उपकार आटयले.
परवीन कुमार हांचे हस्तुकी मॅनग्रुव्हज सोसायटी ऑफ इंडिया संस्थेचे मंगलवन हे खबरांपत्र आनी परिषदेची कार्यावळ पत्रिका हांचे प्रकाशन जाले. गोय राज्यातले प्रदूषणाचे शमन करपाचो विशय दाखोवपी माहिती लघुपट हे वेळार प्रदर्शित जालो. भारत सरकारचे पर्यावरण आनी रानां मंत्रालयाचे उपसंचालक डॉ. राघवन हाणी आपले मुखेल संबोधनात हवामान बदलांत झाडां लावप आनी खारफुटी परतून पिकोवप, ब्लू कार्बन हॅबीटॅट, खारफुटीची झाडां तिगोवपाचे सध्या भारतात अस्तित्वात आशिल्ले उपाय, जैवविविधताय राखपाक प्रशासकी धोरण तयार करतना सकयल्यान वयर वचपाची प्रक्रिया, खारफुटींविशी जैवविविधताय प्रक्रियेचे गिन्यान भारतातले लोकांमदी वाडोवप हे साबार मुद्द्यांचेर उजवाड घातलो. पयले तांत्रिक सत्रात राष्ट्रीय समुद्रविज्ञान संस्थेचे (दोना पावला) आदले जैविक समुद्रशास्त्र विभाग मुखेली आनी निवृत्त प्राध्यापक डॉ. बबन इंगोले हाणी ‘ खाणीतलें नुस्ते जगोवपाक खारफुटीची भूमिका ‘ ह्या विशयाचेर आपले निरीक्षण सादर केले.
सांसारिक पावंड्याचेर उत्कृश्ट अशे २ टक्के विज्ञानिकांमदी जेंची गणना जाता, ते तामिळनाडू ह्या राज्यातले अन्नामलाय विद्यापीठातलें प्राध्यापक कथिरेसन कंदासामी हाणी ‘भारतातल्यो खारफुटी: जगांत एकमेवाद्वितीय ‘ या शीर्षकाखालां आपले गिन्यान दवरतना जैवविविधताय समाज आनी अर्थवेवस्था हांचो परस्पर संबंद हे विशयाचेर आपले विचार उक्तायले. धेंपे म्हाविद्यालय, मिरामार शिक्षण संस्थेचे वनस्पतीशास्त्र विभागाचे आदले मुखेली डॉ काशिनाथ हिरेमठ हें सत्राक अध्यक्ष म्हूण हाजीर आशिल्ले.
साबार तांत्रिक सत्रां जाले उपरांत दोन दिसांमेरेन जाल्ले हे परिषदेत ११ संशोधक विद्वानांनी तोंडी सादरीकरणां सादर केली. समारोप कार्यक्रमाक मुखेल सोयरे म्हूण गोय राज्य जैवविविधताय मंडळाचे सदस्य सचिव डॉ प्रदीप सरमोकादम हाजीर आशिल्ले आनी ताणी उपस्थित संशोधक, विद्यार्थीवर्ग आनी प्राध्यापक हांका मार्गदर्शन केले. डॉ. रंजीता सावईकर आनी पीईएस कॉलेजीचें प्राचार्य व्ही. पिसूर्लेकार हाणी समन्वयक म्हूण जबाबदारी सांबाळील्ली.
🖋️
(सनतकुमार फडते)
