राज्य माहिती आयोगान कोंकणी भाशेंतल्यान न्याय-निवाडो दिवन एक बरी देख घालून दिल्या. तांच्या ह्या यत्नाक परबीं फावता अशें कोंकणी भाशा मंडळ गोंयची अध्यक्ष रत्नमाला दिवकार हांणी सांगलें. कोंकणींतल्यान पत्रवेव्हार जाल्यार तेच भाशेंतल्यान ताका जाप दिवपाचो आदेश राजभाशा खात्याचो आसा. आतां राज्य माहिती आयुक्त आत्माराम बर्वे हांणी आरटीआय कोंकणींतल्यान आयल्यार ताची जाप तेच भाशेंत दिवपाचो निवाडो दिला. राजभाशा कायद्याची अंमलबजावणी जावपाचे नदरेंतल्यान हो निवाडो खूब म्हत्वाचो आसा, अशें रत्नमाला दिवकार हांणी सांगलें.
राजभाशा कायद्याची अंमलबजावणी करपाची जबाबदारी आमची सगळ्यांची हें म्हणटा आसतनाच कोंकणींत न्याय-निवाडो दिवन हेर सगळ्या सरकारी अधिकार्यां खातीर आनी कर्मचार्यां खातीर आत्माराम बर्वे हांणी बरी देख घालून दिल्या, अशें रत्नमाला दिवकार हांणी सांगलें.
मानादीक मुख्यमंत्री आनी राजभाशा मंत्री डॉ. प्रमोद सावंत हें कोंकणी भाशेच्या हितान वावर करीत आसात. सरकारी कामकाज कोंकणींतल्यान चलचें म्हणून राजभाशा संचालनालयान वावुरता. सगळ्या सरकारी खात्यांनी राजभाशा कायद्याक सक्तीन पाळो दिवंक जाय अशें तांणी मुखार सांगलें.
