नवी दिल्ली हांगा जाल्ले जागतिक वा संसारिक मळावेल्या माती परिषदेत (ग्लोबल सॉईल कोन्फरन्स २०२४ ) गोंयचे मातीयेचे म्हत्व, खाशेलेपण आनी वेगळेपण तशेच कलेचे माध्यमातल्यान तिगोवन दवरपाक गोंयातल्या कावी कलेची भूमिका हे विशयाचेर विदेशातल्यान आयिल्ल्या मान्यवरांचे मुखार सादरीकरण करपाची भांगरा संद गोयचे नामनेचे कलाकार, कावी कला जोपासपी, सांबाळपी आनी फुडें व्हरपी सागर नाईक मुळे हाणी सादली. हे सांसारिक पावंड्यावेल्या परिषदेत गोंयचे आनी भारताचे प्रतिनिधीपण ताणी नवी दिल्लीक वचून केले.
गोयचे प्रतिनिधित्व करपाची ही संद मुळे हांका आयसीएआर – भारतीय शेतकी संशोधन परिषद – केंद्रीय दर्यादेगेवयले शेतकी संशोधन संस्थान हे ओल्ड गोवा हांगा आशिल्ल्या शेतकी अभ्यास संशोधन केंद्राचे माध्यमातल्यान मेळील्ली, हे खासा नमूद करपा सारकी गजाल. इंडीयन सोसायटी ऑफ सॉयल सायन्स, हे संस्थेन आयोजित केल्ले या परिषदेचे शीर्षक ” अन्न सुरक्षा, हवामान बदल उपाय येवजण आनी सैमीक वा पर्यावरण यंत्रणा हांचेफुडे वचून मातीयेविशी काळजी ” अशे जावन आसा.
१९ ते २२ नोव्हेंबर २०२४ हे काळात ही परिषद नवी दिल्ली हांगा आशिल्ल्या नॅशनल एग्रीकल्चरल सायन्स सेंटर हे संस्थेचे संकुलात संपन्न जाल्ली.
गोयची माती आनी गोयची कावी कला हांचे माध्यमातल्यान गोयचो वारसो तिगोवन दवरप हे संकल्पनेचेर एक संशोधन अभ्यास अहवालाचे रूपात कावी कलाकार सागर मुळे हाणी ग्लोबल सॉयल कोन्फरन्स २०२४ हे परिषदेत सादर केले. हाचे लिखाण मुळे हाणी मुखेल बरोवपी म्हणून सागर मुळे आनी सहलेखक वा सहाय्यक बरोवपी म्हूण आयसीएआर संस्थेचे वैज्ञानिक हाणी केल्ले आसा. “
पर्यावरणपूरक मातीयेची कला हांचे माध्यमातल्यान वारशाचे जतन करप आनी मातीयेकडेन जोडिल्लें विज्ञान हांका प्रोत्साहन दिवप : कावी कला, एक अभ्यास ” अशे हे संशोधन अभ्यास अहवालाचे शीर्षक जावन आसा. परिषदेचे निमतान मातीयेचे विज्ञान मळावेले तज्ञ, वाटो धरपी वा भागधारक (stakeholders), विद्यार्थी आनी विविध मळावयले लोक हे परिषदेचे वाटेकार म्हूण एकठाय आयले. सांसारिक मळांवयल्या तज्ञ लोकांक एकठाय हाडपी हे जागतिक परिषदेत आयसीएआर गोवा संस्थेचेवतीन एक स्टॉल ऊबो आशिल्लो.
हे स्टॉलाचेर कावी कलाकार म्हूण सागर मुळे हाणी हजर रावून आयसीएआरचे प्रतिनिधी हांचेसयत कावी कलेचे काम, कलाकृती प्रदर्शन हांचे दर्शन घडयतना गोयची कला जागतिक मळाचेर उजवाडाचे केंद्रबिंदूचेर हाडपाक मोलादीक हातभार लायलो. हाचेर सादरीकरण केले अहवालात आनी आयसीएआर संस्थेचेवतीन मुळे हांका आयिल्ल्या निमंत्रण पत्राचेर संस्थेन अशे नमूद केला, परिषदेत वाटेकार जाल्ले विद्यार्थी आनी भागधारक हांचेमदी मातीयेचे विज्ञान हे विशयांविशी जागृताय घडोवन हाडपाक मुळे हाणी केल्ले कावी कलेचे सादरीकरण आनी प्रदर्शन हाणे म्हत्वाचो वाटो घेतलेलो आसा.
तेच भशेन सांस्कृतिक वारसो सांबाळताना समाजात वावुरपाक वा आस्पाव जावपाक मातीयेची कला एक सशक्त आनी ताकदीचे माध्यम कशे जावंक शकता, हीच गजाल मुळे हाणी कावी कलेचे माध्यमातल्यान केल्ले मातीयेचे काम दाखयता, अशेय बी संस्थेन हे पत्रात नमूद केला.
🖋️
(सनतकुमार फडते)
