महाराष्ट्रातले एक कवितेचे व्यासपीठ गाजोवपी कवी म्हटल्यार अशोक नायगावकर जावन आसा. तांचो ‘ सदाबहार नायगावकर ‘ हो हास्यकविता सादरीकरण आनी प्रकट मुलाखतीचो फोंडे हांगा गेल्या आठवड्याचे शेनवरा जालो. मराठी भाशा कमी जावपाचे मुद्द्याचेर हुस्को उक्तायतना आयचे पिळगेमदी मराठी भाशेचो वापर कमी जावपाक ताणी आयचे पिळगेतल्या पालकांक जबाबदार धरले. पालकूच जर घराकडेन मराठी न उलयता इंग्लीश उलोवपाचो अट्टाहास धरतले जाल्यार आयचे भुरगे आनी तरणाटे पिळगेक मराठी कशी जमतली? असो प्रस्न करतना एक भाशेविशी परतून परतून येवपी हुस्को तांचेय बी उलोवप्यान व्यक्त जालो.
गोवा मराठी अकादमी, फोंडे प्रभाग आनी स्वामीराज प्रकाशन, मुंबय हांचेवतीन ‘ सदाबहार नायगावकर ‘ हो अशोक नायगावकर हांचे हास्यकविता संवाद मैफल हे कार्यावळीत ‘ नवप्रभा ‘ दिसाळ्याचे संपादक,लेखक आनी पत्रकार परेश प्रभू हाणी तांचेकडेन संवाद सादलो. हे वेळार व्यासपीठाचेर गोवा मराठी अकादमीचे गोवा मराठी अकादमीचे अध्यक्ष अनिल सामंत, मराठी अकादमीचे फोंडा तालुका प्रभाग समितीचे अध्यक्ष नीलेश नायक, गोवा मराठी अकादमी फोंडा प्रभागाच्यो सचिव श्रीमती वरदा गाड केरकार, इंस्टीट्युट मिनेझीस ब्रागांझा, पणजे हे संस्थेचे अध्यक्ष दशरथ परब आनी स्वामीराज प्रकाशन, मुंबय हे संस्थेचे रजनीश राणे हाजीर आशिल्ले. हे वेळार अध्यक्ष हे नात्यान भाषण करतना अनिल सामंत हाणी गोवा मराठी अकादमी सगले पुराय वर्स कशी कार्यरत आसता आनी मराठी भाशेक लागून कितले तरेकवार उपक्रम राबयता, हाचेविशी म्हायती दिली.
व्यासपीठाचेर उलयतना अशोक नायगावकर हाणी तांची ग्लोबल जाल्ली मराठी कविता, आयची सामाजिक परिस्थिती, एकठाय आसपापसून विभक्त जाल्ली फामिल सिस्टीम वा कुटुंबवेवस्था, उदकाचो स्तर देवपाचो विशय, गरिबी आनी दारिद्र्याचे चित्रण, राजकीय स्थिती, भेराल्ल्याभशेन जाल्यो सामाजिक संवेदना हांचेर कवितेचे माध्यमातल्यान भाष्य करतना लोकांक हासयले पूण तांका गंभीरतायेन विचार करपाक बी प्रेरित केले. आपुण हिंदी टिव्ही माळो पळयता, तेन्ना सगळ्यो नव्यो माळो येता पूण मराठीत त्योच पोरण्यो, आदल्यो माळो परतून दाखोवपाचो यत्न जाता. तेन्ना मराठीची अर्थवेवस्था खंयतरी बिघाडलेली आसा आनी मराठीचेविशी किते चुकता, ताचेर अभ्यास जावचो, अशे नायगावकर हाणी म्हटले.
हॉटेलात वयतना आमी जेवपाक हजारांचे बिल करतात, पुण भुरग्यांक १०० रूपयांचे मोल आशिल्ले पुस्तक आमी कित्याक दिवंक शकनात? असो प्रस्न ताणी उबो केलो. ‘ टिळक ‘, ‘ अल्यूमीनियमची पातेली घेवून ‘ , ” शाकाहार”(गाजिल्ली कविता), ‘ वेड लागल्यावर ‘, ‘ माय ‘, ‘ मी लढलो नाही ‘ ह्यो कविता ताणी सादर केल्यो. प्रेक्षकांमदी नामनेचे कलाकार नितीन कोलवेकार, प्राध्यापक आनी साहित्य तशेच भाशा अभ्यासक विद्या प्रभुदेसाय, उद्योजक हनुमंत नायक आनी हेर मानेस्त प्रेक्षकांमदी आशिल्ले. नाट्यकलाकार जगदीश फडके हाणी सूत्रसंचालन केले. वरदा गाड केरकार हाणी उपकाराचे उलोवप केले. कार्यावळीचे सुरवातेक प्रिया नायक हाणी इशस्तवन सादर केले. आसावरी भिडे हाणी कार्यावळीचे निमाणेक पसायदान सादर केले. कार्यावळीक फोंडेचे कविता आनी साहित्यमोगी लोकांचो उप्पाट प्रतिसाद मेळो.
सनतकुमार फडते