पिलार सोसायटीचे फा. किरीयेल डिसौझा हांकां 24 मार्चाक मरण आयलें. कोंकणी भाशा मंडळान तांकां आर्गां ओंपल्यांत.
फा. किरीयेल डिसौझा हे बार्देशांतल्या बस्तोडें गांवांत रावताले. ते पिलारच्या सोसायटीचे वांगडी आशिल्ले. नागपूर विद्यापिठांतल्यान तांणी पदवीचें शिक्षण मेळयलें. युरोपांतल्या बॅल्जियमांत लूवेन विद्यापिठांत तांणी थियोलॉगी विशयांत मास्टर शिक्षण मेळयलें.
रांची आनी मुंबय डायोसेसच्या ज्योती हायस्कूल आनी फातिमा हायस्कूलांत ते मुख्याध्यापक तशेंच वेवस्थापक म्हणून वावुरल्यात. कोंकणी सप्तकी मासीक ‘वावराड्यांचो इश्ट’ हाचे 1986 ते 1989 वर्सां मेरेन ते संपादक आशिल्ले. वावराड्यांचो इश्ट, गुलाब, दर म्हयन्याची रोटी आनी गोंयच्या आर्चडायोसिसच्या हेर कोंकणी नेमाळ्यांनी ते सातत्यान लिखाण करताले. ‘रोमी मिस्सा ग्रंथा’च्या कोंकणी अणकारा खातीरय तांचो वावर आसा.
गोंयच्या आर्चबिशपाचे ते 8 वर्सां खातीर सहाय्यक आशिल्ले. पिलार थियोलॉजिकल कॉलेजींत ते प्रोफेसर म्हूण वावुरले. तांकां कोंकणी भाशा मंडळाचो लिगोरियो फुर्ताद ट्रस्ट पत्रकारिता पुरस्कार फावो जाल्लो. तशेंच तांकां फेलिस्यु कार्दोजोचे पाटलावदार ट्रस्टाचो फेलिस्यु कार्दोज पत्रकारिता पुरस्कारय फावो जाल्लो.
फा. किरीयेल हे एक शांत सभावाचे व्यक्ती आशिल्ले. कोंकणी भाशा मंडळाच्या वावराची तांकां सदांच तोखणाय आशिल्ली. मंडळान आयज आपलो एक बरो मागपी वगडायला. तांचो वावर आमकां सदांच प्रेरणा दितलो अशें मंडळाच्या वतीन उजवडायिल्ल्या प्रसिद्धी पत्रकांत अध्यक्ष अन्वेषा सिंगबाळ हांणी म्हणलां.
