गोय ही कलाकारांची खाण अशे आमी म्हणटात. आमचे गोयात अशे जायते कलाकार आसात जे लोकसंगीत, लोकनृत्य, घुमट आरती, लोकवाद्यां आनी गोयच्या मातीयेतल्यान येयल्या आनी आमचे जाणटेल्यानी सांबाळून दवरील्ल्यो लोककला आनी तांचे गिरेस्त दायज आपले घटमूट आनी सक्षम खांद्याचेर फुडें व्हरतात. अशेच एक अंत्रूज म्हालातले लोककलाकार जावन आसात ते म्हटल्यार फोंडे म्हालातले म्हार्दोळ मंगेशी हे गावातले प्रद्युम्न चारी.
गोयची लोककला वा फोकआर्ट (Folk art) म्हटले की “कांता गावडे ” हे नाव जशे प्रामुख्यान आमचे तोंडामुखार येता, कारण कांता गावडे हे लोककला मळावयले ” पॉप कल्चर आयकॉन” (pop culture icon) जाल्ले आसात, तशेच वेगवेगळ्या लोककलांनी फामाद आशिल्ल्या कलाकारांमदले एक नाव म्हटल्यार प्रद्युम्न कृपाली कृष्णनाथ चारी. तांचो बापूय कृष्णनाथ चारी हे संगीत शिक्षक आनी फामाद हार्मोनियम वादक. ल्हानपणाच्यान घरातल्या मनशाकडल्यानच घुमट आरती, शामेळ, हार्मोनियम हांचे बाळकडू मेळत राविल्ल्या कारणान प्रद्युम्न हांची घुमट आरती, लोकगीत गायन, वाद्यां जशे की हार्मोनियम ह्या कलांमदली बुनियाद घट जाली.
मंगेशी हांगच्या वागळे हायस्कूल ह्या शाळेत मुळावे वा प्राथमिक आनी यत्ता धावेमेरेन माध्यमिक शिक्षण घेतना घुमट आरती सर्ती, शामेळ वादन, आंतर म्हाविद्यालयीन सर्ती आनी मागीर फुडले पावंडेर तरणाट्या पिरायेचेर जायत्यो सर्तीनी वाटो घेवन मेळत राविल्ल्या बक्षिसांसंयत तांचो आत्मविस्वास लेगीत वाढत गेलो. हे लागून प्रद्युम्न हाणी घुमट आरती आनी लोककला सांबाळून हे दायज फुडें व्हरपाचो निर्धार केलो. आयज ते घुमट आरती शिक्षक म्हूण गोयचे जायते पंगडाक मार्गदर्शन करतात.
चारी हाणी संगीत आनी हार्मोनियम हांची तालीम आपले बापूय कृष्णनाथ चारी हांचेकडेन हाशील केली तर घुमट आरती तयार करपाचे धडे रामदास बोरकार हांचेकडेन घेतले. आरती आनी शिगमोत्सवाची गीतां ते सावर्डे हांगचे रसिकदास वस्त हांचेकडेन शिकले. म्हार्दोळ गावचे श्री साई महालसा आरती मंडळ हे फामाद घुमट आरती पंगडाचे ते वांगडी आनी घुमट वादक म्हूण गेली जायती वर्सा सर्तीनी वाटो घेवन पुरस्कार वा बक्षिसां घेवन येतात. पुराय गोयांत फामाद आशिल्ल्या ह्या घुमट आरती पंगडाची मजत घेवन चारी आयज मेरेन राज्यात वेगवेगळे सुवातेंनी जाल्ल्या घुमट आरती सर्तीनी 500 वेळा परस चड वेळार पयले इनाम घेवन येयल्ले आसात. पुराय गोयांत 100 परस चड वेळा उत्कृश्ट घुमट वादक म्हूण पयले बक्षीस मेळावन आयिल्ले आसात.
राजीव गांधी कलामंदीरचे वर्सुकी घुमट आरती राज्य पावंड्यावयले सर्तीत तांचे श्री साई म्हाळसा हे पंगडान 4 वर्सा सातत्यान पयले इनाम जिकलेले आसा. घुमट आरती कलेत प्रद्युम्न हाणी नवे आनी सर्जनशील प्रयोग बी केल्ले आसात. घुमटाचेर एकाच वेळार दोनदा चामड्याचे भागाचेर थाप वाजोवन ठेका धरप, घुमट वादनात नवे प्रकारचे बोल वा ताल धरून नवे ध्वनी वा आवाज काडप तशेच एकाच वेळार एकाच आरतीत घुमट दोन पद्धतीन वाजोवपाची द्विताल शैली वा पद्धत (Two rhythmic pattern in ghumat aartis ) ही नवी शैली जी फामाद जाता, ती चारी हाणीच नावारूपाक हाडिल्ली आसा.
आयज प्रद्युम्न चारी एक नामनेचे ताल कलाकार, पारंपरिक वाद्यांचे फ्युजन संचालक, लोकसंगीत अभिकल्पक वा रचनाकार (music designer), घुमट आरती वादन प्रशिक्षक, संगीत संचालक आनी गायक म्हूण कार्यरत आसात. कार्यशाळा, वर्ग आनी सामूहिक मार्गदर्शन हे सारके उपक्रम राबोवन ताणी 1500 परस चड भुरग्यांक घुमट आरती शिकयल्ली आसा. दादल्यांच्या घुमट आरतीचे 13 पंगड आनी बायलांचे घुमट आरतीचे 4 पंगड मेळुन 17 पंगडाचे चारी मार्गदर्शक म्हूण आसात. गोयचो पयले क्रमांकाचो पुणेरी ढोल ताशा पथक म्हटल्यार उजगाव हांगचो शिव संस्कृती प्रतिश्ठान हो पथक, जाणे चारी हांचे नेतृत्वाखालां कर्नाटक आनी महाराष्ट्र हांगा जाल्ले ढोल ताशा सर्तीत सलग 4 फावटी पयले इनाम घेतलेले आसा. आरंभ प्रतिष्ठान हे संस्थेचे वतीन आयोजित केल्ल्या ऑल इंडिया ढोल ताशा कॉम्पिटिशन हे अखिल देश पावंड्यावेल्या सर्तीत मुंबयच्या ताल संग्राम डोंबिवली हे पथकाचे वतीन वाटेकार जावन उत्कृश्ट ताशा वादक म्हूण इनाम मेळेयल्ले आसा. खांडेपार, फोंडे हांगचे खांडेपार शिगमोत्सव समितीचे ते मार्गदर्शक (Mentor) आसा आनी तेंच्या नेतृत्वाखाला समितीन सलग 5 वेळार पयले इनाम मेळयील्ले आसा.
चारी हाणी तरेतरेच्या घुमट आरती पंगडांक घेवन आता मेरेन घुमट आरतीचे 6 म्युझिक अल्बम काडिल्ले आसा. श्री साई म्हाळसा आरती मंडळाबरोबर घुमट वरदान भाग 1, 2, 3 अशे तीन अल्बम आसात जातुंत सुरेश वाडकर, अमोल बावडेकर आनी पंडित अजितकुमार कडकडे सारकील्ले दिग्गज भक्तीगीत आनी भावगीत गायकांनी गीतां गायिल्ली आसात. श्री केळबाय सातेरी आरती मंडळाचे गोयचे कलाकारांचे पंगडासयत ” घुमट छंद” हो आरत्यांचो अल्बम तांचे कलेच्या सेवेच्या खात्याचेर जमा आसा. श्री कटमगाळ दादा आरती मंडळ हे देवस्थानाचे आरती पंगडाबरोबर “घुमट अध्याय” हो अल्बम काडील्लो आसा. तातूंत शंकर महादेवन आनी अवधूत गुप्ते सारकील्ले हिंदी आनी मराठी सिनेमाविश्वातले दिग्गज गायक आनी संगीतकारांनी गीतगायनाचे माध्यमातल्यान योगदान दिल्ले आसा, ही विशेष गजाल. शर्व मिडिया हे माध्यम आस्थापनाची मजत घेवन सगली बायला कलाकारांक घेवन “गोमंत घुमट गाज ” हो अल्बम काडील्लो आसा. आपले ” इत्ताहम”(ITTAHAM ) हे युट्यूब चेनलाचे वरवी घुमट, शामेळ आनी कासाळे वाजोवपाचे धडे ऑनलाइन माध्यमातल्यान दिवपी ते गोयचे पयले आनी एकमेव कलाकार थारलेले आसात.
प्रद्युम्न हांचे कलाकार म्हणून सत्कार बी तशेच बरे जाल्ले आसात. सम्राट क्लब इंटरनॅशनल हाचो सत्कार तशेच फोंडेचे राजकी फुडारी आनी समाजसेवक राजेश वेरेकार हांचे फोंडा फर्स्ट संघटनेचेवतीन गुरुपौर्णिमेचे दिसा तांचो सत्कार केल्लो आसा. ” अंत्रूज युवा कलाकार” हे गोयचे आघाडीचे लोककला आनी सांस्कृतिक पंगडान तांचो सत्कार केला. मैत्री क्रियेशन्स, हळदोण हे संस्थेन संगीताचे क्षेत्रात अतुलनीय योगदान दिल्ले कारणान तांचो सन्मान केल्लो आसा. एखाद्या कलेक झोकून दिल्ल्या कलाकाराक गोयात कितलो मान सन्मान मेळुंक शकता हाचे प्रद्युम्न चारी एक उदाहरण जावन आसा.
हालीचे तेपार देशाचे प्रधानमंत्री नरेंद्र मोदी हांचे ” पीएम हाऊज दिल्ली” ह्या दिल्लीचे पंतप्रधान निवासस्थानाचेर वचून हेर कलाकारांबरोबर प्रधानमंत्री नरेंद्र दामोदरदास मोदी हांचेकडेन संवाद सादपाची संद चारी हांका मेळील्ली आसा. ही हाली तेपावयली आपली एक व्हड उपलब्धी (Achievement ) आसा, अशे प्रद्युम्न चारी म्हणटात. चारी हांका तांचे कलेचे मळाचेर फूडल्या प्रवासाक लागून आमच्यो गोयकारांच्यो शुभेच्छा उक्तायता.