केंद्रीय साहित्य अकादेमीन गुजरात साहित्य अकादमी आनी गांधीनगर साहित्य सभा हांच्या जोडपालवान घडोवन हाडिल्लें पश्चीम क्षेत्रीय युवा लेखक संमेलनांत कोंकणी भाशेंतले युवा लेखक वांटेकार जाले. हें संमेलन आयतार 22 डिसेंबर 2024 ह्या दिसा गुजरात गांधीनगरांतल्या गुजराज साहित्य अकादेमीच्या झवेरचंद मेघाणी भवनाच्या सभाघरांत जालें.
ह्या संमेलनाच्या पयल्या सत्रांत ‘हांव कित्याक बरयतां’ ह्या विशयाचेर युवा लेखक आनी कार्यकर्तें स्नेहा सबनीस हांणी आपले विचार व्यक्त केले. कोंकणी भाशा चळवळीचेर उजवाड घालत, भाशेचो वापर एकवट सादूंक करूंक जाय आनी समाजांतले विशय मांडूंक साहित्या सारकें दुसरें माध्यम ना, अशें स्नेहा सबनीस हांणी सांगलें. ह्या सत्राचें अध्यक्षपद गुजराती साहित्यकार परिक्षित जोशी हांणी सांबाळ्ळें. ह्या सत्रांत गुजराती, सिंधी आनी मराठी ह्या भाशेंतल्या युवा लेखकांनी लेगीत आपले विचार मांडले.
दुसर्या सत्रांत कोंकणी, गुजराती, सिंधी आनी मराठी भाशेंतल्या काणयांचें सादरीकरण जालें. केरळ कासरकोडचे लेखक आनी पत्रकार स्टेनी डिसुझा, हांणी ‘फ्रिडम पार्क’ ह्या माथाळ्या खाला आपली कथा सादर केली. हे कथेचो इंग्लीश अनुवाद लेगीत तांणी सादर केलो. मॉरल पुलिसिंग ह्या विशयाचेर आदारीत ही कथा आशिल्ली. ह्या सत्राचे अध्यक्ष सिंधी साहित्यकार जेठो लालवाणी आशिल्ले.
तिसर्या आनी निमाण्या सत्रांत, कोंकणी कवी आनी प्राध्यापक गोविंद मोपकार हांणी तीन कविता सादर केल्यो. गोविंद मोपकार हांणी गोंयचें वर्णन करपी तशेंच स्त्री केंद्रीत कविता सादर केल्यो. ह्या वेळार तांणी गोंयच्या सैमाचें तशेंच संस्कृतायेचें वर्णन करपी कोंकणी कविता गावन सादर केली. ह्या सत्राचें अध्यक्षपद गुजराती साहित्यकार परिक्षित जोशी हांणी सांबाळ्ळें. ह्या युवा संमेलनांत, गोंय, महाराष्ट्र, गुजरात, केरळ वाठारांतल्यान एकूण 20 युवा लेखक वांटेकार जाल्ले.
