फर्मागुडी, फोंडे हांगा आशिल्ल्या पीईएस रवी नायक कला विज्ञान म्हाविद्यालयाचे आवारात “रानभाज्यां महोत्सव आनी प्रदर्शन” हो महोत्सव कार्यक्रम उमेदीन जालो. गोंय राज्याचे कृषि मंत्री रवी नायक हांचेसयत फोंडेचे फामाद आनी कर्तुबगार लोकांनी ह्या महोत्सवाक आपली हजेरी मुजरत लायली.
फोंडा एज्युकेशन सोसायटीच्या (पीईएस) रवी सीताराम नायक म्हाविद्यालय, फर्मागुडी हे शिक्षणसंस्थेचे वनस्पतीशास्त्र (बॉटनी) विभागाचेवतीन फोंडा जैवविविधताय वेवस्थापन समितीचे सहकार्यान वा जोडवावरान “गोंयातल्यो रानभाज्यो आनी तांची रूचिकताय: गोयचे जैवविविधतायेची संपन्नताय हांचो सोद” अशे शीर्षक आशिल्ले हे प्रदर्शन म्हाविद्यालयाचे लायब्ररीत वाचन कक्षात जालें. कार्यावळीचो मूळ उद्देश आयचें तरणाटे पिळगेंमदी स्थानिक रानभाज्यों हांचेविशी जागृताय करपाची आनी जैवविविधताय आनी तिचे म्हत्व हांचो वळख नव्या पिळगेक करून दिवप, असो आशिल्लो.
राज्याचे शेतकी, हस्तकला आनी नागरी पुरवण खात्यांचे मंत्री तशेंच पीईएस संस्थेचे चेअरमन रवी नायक हांचे हस्तुकी प्रदर्शनाचे उक्तावण जालें. हें वेळार संस्थेचे वेवस्थापन समितीचे वांगडी म्हटल्यार सचिव रितेश रवी नायक, खजिनदार प्रकाश बाळवे, कार्यकारी सदस्य किशोर नायक, हृषिकेश धारवटकर, म्हाविद्यालयाचे प्राचार्य प्राध्यापक विकास पिसूर्लेकार, उपप्राचार्य डॉ. सतीश केळुस्कार आनी वनस्पतीशास्त्र विभागाच्यो मुखेली डॉ. रंजीता सावईकर तशेच फोंडे वाठरातले वट्ट ५ जैवविविधताय वेवस्थापन समित्यांचे (बीएमसी ) गटांचे पदाधिकारी आनी वांगडी हाजीर आशिल्ले. बांदोडा, आगापूर, मडकई, प्रियोळ आनी दुर्भाट हांगचे बीएमसी गटांचो हातूंत आस्पाव आशिल्लो. हे साबार गटांचे प्रतिनिधी म्हूण देवेश नायक, गौतम नायक, डॉ. विद्या सतरकर आनी दत्ता नायक हे हाजीर आशिल्ले.
प्रियोळ बीएमसी अध्यक्ष दत्ता नायक हाणी रानात मेळपी ३० भाज्यो हांचे प्रदर्शन मांडले. तांची म्हायती विस्तारान दिवपी संदर्भ ताणी दर एका भाजेचे कुशीक मांडलेले पळोवंक मेळे. अशे विविध जैवविविधताय वेवस्थापन समितीच्या (बीएमसी ) वांगडी, शिक्षक आनी विद्यार्थी हाणी मांडील्ल्या ३४ वेगवेगळ्या खाद्यपदार्थांच्यो वळेरी हे वेळार हाजीर आशिल्ल्या रानभाज्यो मोग्यांक पळोवंक मेळ्यो. शेतकी मंत्री रवी नायक हाणी तरणाट्यां वर्गाक मार्गदर्शन करतना सैमाची राखण करचे तशेच बेसबरी तुडतुडीत भलायकी कमोवपाक लागून स्थानिक भाज्यांचो आस्पाव आपले सदाचे आहारात आनी जेवणात करचो, अशे आवाहन केले. हेर मानेस्तांनी वर्गाचे भायर येवन शिकप कितले गरजेचे तशेच जैवविविधताय वेवस्थापन समितीचेर सक्रीय वाटो घेवन वावर करप कितले म्हत्वाचे, ह्या मुद्द्यांचेर आपले विचार उक्तायले. प्राचार्य प्रा. विकास पिसूर्लेकार हाणी येवकाराचे उलोवप केले.
सुत्रनिवेदन दुसरें वर्साची छात्रा अमीरा शेख हाणी केले. तरेतरेच्या समित्यांचे १० वांगडी, शिक्षकवर्गाचे ३५ वांगडी आनी ४३ विद्यार्थी अशे साबार सैम मोग्यांनी प्रदर्शनाचो लाव घेतलो.
🖋️
(सनतकुमार फडते)
