नाटकातले संवादाचे बाबतीत शब्दांचे उच्चार आनी शब्दफेक हांचेविशी केन्नाच तडजोड न केल्लो दिग्दर्शक म्हूण वळख वा ख्याती आशिल्ले दिग्दर्शक आनी अभिनेतो सर्गेस्त मधुकर जोशी हे कलागुणानी भरील्ले अष्टताशी व्यक्तिमत्व आशिल्ले, अशे मत जेश्ठ रंगकर्मी धर्मानंद गोलतकर हाणी फोंडे सर्गेस्त जोशी हांचे यादस्तीचे निमतान आयोजित केल्ले कार्यक्रमात उक्तायले. जोशी हांचे जीवनाचेर आदारील्ल्या ” मधुस्मृती” हे पुस्तकाचे लोकार्पण हे वेळार जाले.
फोंडेचे राजीव गांधी कलामंदिर हांगा जाल्ले कार्यक्रमाक धर्मानंद गोलतकर मुखेल सोयरे म्हूण उलयताले. मधुकर जोशी संसाराक अंतरल्याक दोन वर्सा पुराय जातात. दुसऱ्या स्मृतिदिनाचे निमतान विष्णू स्मृती प्रतिष्ठान गोवा हाणी आयोजित केल्ल्या हे कार्यक्रमाक माचीयेर गोवा मराठी अकादमी फोंडा प्रभागाचे अध्यक्ष निलेश नायक, कार्यावळीच्यो निमंत्रक अनुराधा प्रभुदेसाय, खरवस हे लघुपटाचे दिग्दर्शक आदित्य जांभळे, मधुस्मृती पुस्तकाच्यो संपादक आसावरी भिडे हाजीर आशिल्ले. गोलतकार हाणी फुडें उलयतना जोशी हांच्यो जायत्यो यादी ताज्यो केल्यो.
बालनाट्य चळवळ फुडें व्हरतना जोशी हाणी कठपुतळीचो खेळ आनी जादू कलेचो अभ्यास केलो आनी कलेक समर्पित अशी जीण ते जगले, अशे मत उक्तायले. कार्यावळीची सुरूवात स्वराली वळवयकार हाणी सादर केल्ल्या ईशस्तवन गीतान जाली.
प्रतिष्ठानाच्यो विश्वस्त आसावरी भिडे हाणी येवकाराचे उलोवप केले. समन्वयक निलेश नायक हाणी प्रास्ताविक केले. “आर्टिकल 370” हे सुपरहिट बॉलिवूड सिनेमाचे दिग्दर्शक आणि नाट्य कलाकार आदित्य जांभळे हाणी उलयतना जोशी सरांकलागून आपले नाट्यकलेक कशे प्रोत्साहन मेळे आनी वाव तयार जालो, हे विशी सांगले. रंगकर्मी न्यानेश मोघे, नेपथ्यकार आनी चित्रकार किरण नायक, संदेश पेंडसे हाणी सर्गेस्त जोशी हांका फुला अर्पण केली आनी जोशी हांचेर आपले विचार उक्तायले. खरवस हो राष्ट्रीय पुरस्कार मेळील्लो लघु चित्रपट हे वेळार प्रदर्शित जालो.
कार्यावळीचे सूत्रसंचालन प्रा. शेफाली नायक दलाल हाणी केले आनी अनुराधा प्रभुदेसाय हाणी उपकार आटयले. मधुस्मृती पुस्तकालागून योगदान दिल्ले सगल्यांचो हे वेळार स्मृतिचिन्ह दिवन सन्मान केलो. कार्यावळीक प्रेक्षकांमदी नाटक आनी कलेचे क्षेत्रातले जायते मानेस्त हाजीर आशिल्ले.
✒️
सनतकुमार फडते
