छत्रपती संभाजी महाराज हाणी गोयात आयिल्ले आसतना फोंडे वाठारांत म्हटल्यार अंत्रूज म्हालातल्या हिंदू आनी हिंदु देवळांचे संरक्षण करपाक लागून पोर्तुगीजांचे विरोधात निर्भीडपणान लढो दिलो. हे लढ्यात मर्दनगडाचे म्हत्वाचे योगदान आसा. आमचे पूर्वजांचे शौर्य फुडले पिळगेकडेन पावपाक लागून हे अशा किल्ल्यांचे संवर्धन करप हे खूब गरजेचे आसा, अशे मत वा निरीक्षण इतिहासकार सचिन मदगे हाणी फोंडे हांगा व्याख्यानात उलयतना उक्तायले.
फोंडेचे मर्दनगड संवर्धन समितीचे वतीन किड्स नेस्ट हायस्कूलच्या सभाघरात ” छत्रपती संभाजी महाराज आनी मर्दनगडाचो इतिहास हे विशयाचेर नामनेचे इतिहास तज्ञ सचिन मदगे हांचे व्याख्यान जाले. हे वेळार व्यासपीठाचेर हिंदु जनजागृती समितीचे राष्ट्रिय प्रवक्ते रमेश शिंदे आनी राजेंद्र देसाय हाजीर आशिल्ले.
मदगे हाणी ह्या विशयाचेर सविस्तर उलयतना म्हटले, 28 जून 1756 ह्या तारखे दिसा पोर्तुगीजांनी मर्दनगडाचेर केल्ल्या हल्ल्यात मराठ्यांच्या हातातल्यान लुईस मास्कारेन्हस काउंट द अल्वा हो पोर्तुगीज व्हायसरॉय हाका मरण आयले. हे पराभवाचो राग धरून परत परत मराठ्यांचे संकष्ट पोर्तुगीज सत्तेचेर नाका म्हुण फुडले काळात पोर्तुगीजांनी हो किल्लोच पुराय उद्ध्वस्त केलो.
ते लागून आमचे पूर्वजांच्या इतिहासाचे स्मरण करपाक लागून मर्दनगड परत एक फावट उर्बेभरीत अवस्थेत हाडप गरजेचे आसा. आमचे पूर्वजांची शूरत्व वा शौर्य फुडले पिळगेकडेन पावोपाक लागून ह्या अशा तरेच्या किल्ल्यांची जतनाय करप खूब गरजेचे आसा.
कार्यावळीची सुरुवातेक शंखनाद जालो आनी मानेस्तांचे हस्तुकी दीप प्रज्वलन करून कार्यावळीची सुरूवात जाली. उपरांत मर्दनगड संवर्धन समितीचे फुडले कार्याची दिशा सांगतना रमेश शिंदे हाणी म्हटले, “आता आमी सगले संघटित जावया आनी मर्दनगडाचे संवर्धन तशेच संरक्षण करपाचो संकल्प करूया.”
कार्यावळीचे सुरुवातीक मनोज गावकर हाणी कार्यक्रमाचो उद्देश स्पष्ट केलो. सूत्रसंचालन सौ. सुप्रिया केतकर हाणी केले तर उपकार आटयले राजेंद्र देसाय हाणी केले. हे कार्यावळीक सुमार ११० नागरिक हाजीर आशिल्ले.
