ढवळी, फोंडा हांगा आशिल्ल्या ढवळी सार्वजनिक गणेशोत्सव समितीचे माटवात लोकविश्वास प्रतिष्ठान, फोंडे हे शिक्षणीक संस्थेचो ‘ बाझार डे ‘ व्हडा उमेदीन साजरो जालो. प्रतिष्ठानाचे भुरग्यांनी घरगुती उपेग जावपी वस्तू, पेय पदार्थ आनी खावपाचे जिन्नस, मिठाई, चटपटीत मसालेदार खावपाचे पदार्थ लोकांक विकून आपले बाझारहाटीचे आनी वेवसायिक कौशल्य दाखयले. फोंडे वाठारातले लोकांनी बी व्हड गर्दी करून ह्यो वस्तू विकत घेवन आनी हे खाणांचो आस्वाद घेवन प्रतिष्ठानाची उमेद दोट्टी क्षमतेन वाडयली.
लोकविश्वास प्रतिष्ठान ही संस्था गेली वीस वर्सासावन चड काळातल्यान फोंडे आनी गोयातल्या हेर भागातल्यान थय शिकपाक येवपी विशेष वा खासा क्षमता आशिल्ल्या भुरग्यांक शालेय तशेच वेवसायीक स्तराचे शिक्षण दिवन तांका स्वतंत्र आनी संसारात जगपाक खंबीर मनीस म्हूण उबो करपाक हातभार लायतात.
बाझार डे कार्यक्रमाचे उक्तावण सुवाळ्याक लोकविश्वास प्रतिष्ठानचे शिक्षक शिवदास च्यारी, ढवळी सार्वजनिक गणेशोत्सव समितीच्यो अध्यक्ष आनी समाजसेविका वेदांगी ढवळीकर (मुखेल सोयरी), उद्देजक देवेंद्र ढवळीकर, पालक, शिक्षकवर्ग, फोंडे वाठारातले नागरिक व्हडा संख्येन हाजीर आशिल्ले. दिपप्रज्वलन जाल्ले उपरांत पालकांनी एका स्टॉलाचे रिबन कापून स्टॉलांचे उक्तावण केले.
पालकांनी हे वेळार भुरग्यांनी तयार केल्ल्यो तरेतरेच्यो खावपाच्यो वस्तू आनी पदार्थ हांचो आस्वाद घेतलो. खावपाचे जिनस, घरगुती उपेगाच्यो वस्तू, भाजी, फळां हांची विक्री करपाक शिक्षकांनी भुरग्यांक मजत केली.
फोंडे वाठारातले हेर उच्च माध्यमिक विद्यालयातल्या भुरग्यांनी आपले शिक्षकांबरोबर येवन प्रतिष्ठानाचे भुरग्यांनी तयार केल्ल्यो वस्तू विकत घेतल्यो, आनी खावपाचे जिन्नसाचो आस्वाद घेतलो. भुरग्यांक वालोर दितना मुखेल सोयरी वेदांगी ढवळीकर हाणी म्हटले, ” सगल्यो वस्तू आनी जिनस भुरग्यांनी तयार केल्ल्यो आसा आनी तोखणाय करपा सारकी गजाल म्हटल्यार टॅटू करप, बॅगा, कागदाच्यो पिशव्यो बेस बऱ्यो तशेच हातानी केल्ल्यो आसा.
ढवळी सार्वजनिक गणेशोत्सवाचो मंडप तांका फुडें फुकट मेळटलो.” नारायण नावती आनी मनोहर आडपयकार हाणी हांगा येवन भुरग्यांची तोखणाय करतना तांका प्रोत्साहन दिवपाचे काम केले.
✒️
सनतकुमार फडते
