“समाजाचे भल्याक लागून वा बरे जावपाक लागून, आपुण समाजाविशी जपासालदार जावन आसा, हो विचार फुडल्यान दवरून सकारात्मक आनी विधायक वावराचे आदाराचेर आपणे कार्यरत रावपाक जाय. देशात विधायक वावराक लागून फकत राजकीय पक्षच न्हय तर सर्वसामान्य जनतेनय बी सहभाग घेवपाक जाय, तरच समाजाचो विकास शक्य आसा. लोकांचो सहभाग आसले बगर समाजिक उदरगत वा विकास हो अशक्य आसता ” अशे मत केंद्र सरकारच्या नवे आनी अक्षय ऊर्जा मंत्रालयाचे केंद्रीय राज्य मंत्री, श्रीपाद नायक हाणी पणजे हांगा आयोजित केल्ल्या सत्कार समारंभ, पुस्तक प्रकाशन आनी काव्य संमेलन कार्यावळीत उलयतना उक्तायले.
पुणे, महाराष्ट्र हांगसरल्या विश्वशांती बहुउद्देशीय सेवाभावी संस्थेचेवतीन आनी इन्स्टिट्यूट मिनेझिस ब्रागांजा संस्था, पणजी हांचे सहयोगात गोय आनी महाराष्ट्र राज्यांतल्या साहित्य, कला, महिला सशक्तीकरण आनी समाजसेवा वा समाजकार्य ह्या क्षेत्रात कार्यरत आशिल्ल्या लोकांचो सत्कार जालो.
आपले भाषणात फुडें उलयतना मंत्री नायक हाणी म्हटले, 2047 मेरेन भारताक पुराय विकसित राष्ट्र करपाचे माननीय प्रधानमंत्री नरेंद्र मोदी हांचे कार्यात सगल्यानी हातभार लावपाक जाय. गोयचे सहकार मंत्री आनी शिरोड्याचे आमदार सुभाष शिरोडकार हाणी हे वेळार लोकांकडेन संवाद साधलो आनी अशे तरेच्या कार्यक्रमांचे माध्यमातल्यान लोकांनी एकमेकांक मेळप गरजेचे आसा आनी सामाजिक घटकांची सेवा जावप गरजेचे आसा, अशे मत उक्तायले.
कवी संमेलनाच्या माध्यमातल्यान कवी समाजमनात वादळ निर्माण करूंक शकता आनी ते लागून कविता आनी साहित्यविषयक कार्यक्रम जावप गरजेचे आसा, अशेय बी ताणी नमूद केले.
हे कार्यक्रमात गोयचे पत्रकार तशेच कोकण मराठी परिषदेचे अध्यक्ष आनी जागर प्रकाशनाचे मुखेली सुदेश आर्लेकर हांका विश्र्वशांती साहित्य गौरव पुरस्कार, वैचारिक लेखक आनी कादंबरीकार तशेच उद्देजक गुरुदास भालचंद्र नाटेकर हांका विश्र्वशांती साहित्य गौरव पुरस्कार प्रदान केलो.
गोयचे फामाद चित्रपट अभिनेतो, नाट्य दिग्दर्शक आनी सूत्र निवेदक नितीन श्याम शेट कोलवेकार हांका विश्र्वशांती कला गौरव पुरस्कार फावो करून तांचो सन्मान केलो. समाजसेविका म्हूण वावुरपी खतिजा खान हांका आदर्श महिला पुरस्कार तर पांडुरंग गावकर हांका आदर्श समाजसेवक पुरस्कार फावो जालो.
छत्तीसगड हांगच्यो सुनीता रहाटे हांका समाजरत्न पुरस्कार जाल्यार छत्रपती संभाजी नगर हांगचे कृष्णा गुंड हांका राष्ट्रीय समाजरत्न पुरस्कार फावो जालो. निशांत निटवे हे समाजरत्न पुरस्कार, विलास माळी हे कृषिरत्न पुरस्कार जाल्यार दत्तात्रय कांबळे हे शिक्षकरत्न पुरस्कार फावो जावपी मानेस्त थारले.
व्यासपीठाचेर उदघाटन सत्राचे वेळार मुखेल सोयरे म्हूण रोहिदास दाद देसाय कार्यावळीचे अध्यक्ष म्हूण जाल्यार खासा उपस्थित म्हूण ज्येश्ठ आदवोगाद ॲड. एच. एल. हाजीर आशिल्ले. हे वेळार व्यासपीठाचेर पुण्यातले ज्येश्ठ अधिवक्ते ॲड. एन. डी. पाटील, गोयचे फामाद सर्जन आनी आनी हृदयरोग तज्ञ डॉ. दिगंबर नायक, कवी अपसर शेख, साहित्यिक गजानन देसाई, जेश्ठ पर्यावरणवादी कार्यकर्ते आनी लेखक राजेंद्र केरकर, महेश राणे, मराठी राजभाषा समितीचे विनोद पोकळे, समाजसेविका आनी प्राध्यापिका बीना नायक, विश्र्वशांती बहुउद्देशीय संस्था, पुणे या संस्थेचे अध्यक्ष डॉ. संजय भाऊ चौधरी, मिनेझिस ब्रागांझा संस्थेचे सचिव अशोक परब हे मान्यवर हाजीर आशिल्ले.
श्रद्धा गवंडी हाणी संपादित केल्ल्या “पाऊस”, “गोमंत वैभव” आनी “गोमंत लोकसंचित” या पुस्तकाचे प्रकाशन हे वेळार मानेस्तांच्या हातातल्यान जाले. श्रद्धा गवंडी हाणी ह्या पुस्तकांचे विशी आपले मनोगत उक्तायले. प्रा. गौरी नाडकर्णी हाणी तीनय पुस्तकांचेर भाश्य केले. कार्यावळीचे सूत्रसंचालन कवयित्री आनी शिक्षिका श्रीमती अक्षता किनळेकर हाणी केले. उपकार आटोवपाचे सोपस्कार कवयित्री श्रीमती रेखा पौडवाल हाणी केले.
कार्यक्रमाचे मुखेल सत्रात दिनेश बोबली, संजय चौधरी, रोहिदास दाद देसाई, ॲड. धुमे, कामगार नेते अजितसिंह राणे, ज्येश्ठ आदवोगाद एन. डी. पाटील हांचो भोवमान केलो. कार्यावळीच्या दुसरे सत्रात काव्य संमेलन जाले. तातूंत शुभा घोडगे, चित्रा क्षीरसागर, विंदा नायक आनी हेर कवयित्री हाणी वाटो घेतलो.
