लेखन करचें पयलीं वाचन, चिंतन करप म्हत्वाचें आनी साहित्याची निर्मणी करून करियर घडोवं येता अशें मुख्यमंत्री डॉ. प्रमोद सावंत हांणी सांगलें. कोंकणी कवी डॉ. मनोहरराय सरदेसाय हांचें जिवीत आनी तांचो वावर विद्यार्थ्यांनी समजून घेवंक जाय, अशेंय तांणी मुखार सांगलें.
लोककवी डॉ. मनोहरराय सरदेसाय हांचे जल्मशताब्दी वर्साची समारोप कार्यावळ म्हणल्यार ‘मनोहर यादी’ ही गीत-संगिताची कार्यावळ गोवा कोंकणी अकादेमी, कोंकणी भाशा मंडळ गोंय, राजभाशा संचालनालय आनी रवींद्र भवन सांखळी हांणी जोड पालवान सांखळीच्या रवींद्र भवनांत 18 जानेवारीक घडोवन हाडली. कार्यावळीच्या उक्तावण सुवाळ्या वेळार मुखेल सोयरे ह्या नात्यान मुख्यमंत्री डॉ. प्रमोद सावंत उलयताले.
ह्या सुवाळ्याक रवींद्र भवन सांखळेचे उपाध्यक्ष विशांत चिमुलकार, राजभाशा संचालनालयाचे उपसंचालक अनिल सावंत, गोवा कोंकणी अकादेमीचे प्रतिनिधी आग्नेल फर्नांडीस, कोंकणी भाशा मंडळाचे उपाध्यक्ष रुपेश ठाणेकार, रवीन्द्र केळेकार ज्ञानमंदिराचे मुख्याध्यापक अनंत अग्नी माचयेर हजर आशिल्ले. मंडळाचे उपाध्यक्ष रुपेश ठाणेकार हांणी सगळ्यांक येवकार दिलो आनी उपरांत कार्यावळीक सुरवात जाली.
मनोहर यादी हे कार्यावळींत अक्षय नायक, गौतमी हेदे बांबोळकार आनी लक्ष्मण नायक ह्या गोंयच्या नामनेच्या गायकांनी, डॉ. मनोहरराय सरदेसाय हांणी रचिल्लीं गितां गावन विद्यार्थ्यांचीं आनी उपस्थीत मानेस्तांचीं, शिक्षकांचीं मनां जिखलीं. हे कार्यावळीचें सुत्रसंचालन अनंत अग्नी आनी मानसी केरकार हांणी केलें. मनोहररायांचीं कवनां तशेंच तांची जीण आनी वावर आपल्या सुत्रनिवेदनांतल्यान तांणी लोकां मुखार दवरलो. हे कार्यावळीक वेगवेगळ्या वाठारांतले शिक्षक, विद्यार्थी, कोंकणी कार्यकर्ते, साहित्यीक आनी फुडारी हजर आशिल्ले.
