कोंकणी भाशा मंडळ, गोंय आयोजीत 20वी शणै गोंयबाब कथामाळ सर्त अंदूंय ऑनलायन जातली. कोवीड महामारीचे फाटभुंयेर मंडळान ही सर्त ऑनलायन घेवपाचो निर्णय घेतला. दरेकी शाळेंतल्यान पांच सर्तक वांटेकार जावंक शकतले. ऑनलायन सर्त आशिल्ल्यान सर्तीच्या नेमांत कांय बदल केल्यात.
ही कथामाळ सर्त, पयली ते चवथी, पांचवी ते सातवी आनी आठवी ते धावी अशा तीन गटांनी आयोजीत जातली. पयली ते चवथी गटांतल्या भुरग्यांक 2 ते 4 मिणटां, पांचवी ते सातवी गटांतल्या भुरग्यांक 3 ते 5 मिणटां आनी आठवी ते धावी गटांतल्या भुरग्यांक 4 ते 6 मिणटां ह्या वेळां भितर काणी सांगची पडटली.
सर्ती खातीर व्हिडियो स्वरुपांत काणी रिकॉर्ड करून धाडची पडटली. तशेंच व्हिडियो वन शॉट (सेगीत काडिल्लो व्हिडियो) आसचो पडटलो. कसल्याच प्रकारचे आवाज, चित्रीकरण आनी एनिमेशन संदर्भांतले अतिरिक्त सोपस्कार (एडिटींग) व्हिडियोंत आसचें न्हय. एका विद्यार्थ्याक काणयेचो एकच व्हिडियो धाडपाक मेळटलो. व्हिडियो गुगल ड्रायव्हाचेर घालून मागीर ते लिंक मंडळाक ई-मेल करचें पडटलें. ई-मेलांतल्यान व्हिडियो धाडप शक्य ना तांणी आपलो व्हिडियो सिडी वा डिवीडी स्वरुपांत कोंकणी भाशा मंडळाच्या कोंकणी भवन, शंकर भांडारी मार्ग, विद्यानगर, मडगांव नामन्याचेर धाडचे.
सिडी वा डिवीडी, मंडळाक 20 नोव्हेंबरा पयलीं मंडळांत पावंक जाय. व्हिडियो स्वरुपांत काणी 20 नोव्हेंबर 2021 ह्या दिसा मेरेन ई-मेल करची. 20 तारखेर रातच्या 12 वरां उपरांत आयिल्ले व्हिडियो सर्ती खातीर आसपावन घेवचे नात. हे कथाकथान सर्ती संबंदीची सगळी माहिती आनी नेम कोंकणी भाशा मंडळाच्या https://konkanibhashamandal.com/शणै-गोंयबाब-कथामाळ-2021/ ह्या संकेतथळाचेर उपलब्ध आसा. गोंयांतल्या सगळ्या शाळांक हे विशींची माहिती ईमेल केल्या.
शालेय, केंद्रीय, जिल्लो आनी राज्य पांवड्या वेल्या दर एका सर्तकाक प्रमाणपत्र भेटयतलें. केंद्रांत जावपी सर्तींतल्या जैतीवंतांक पुस्तक रुपान इनामां भेटयतले. राज्य पांवड्या वेल्या जैतीवंतांक रोख इनामां आनी यादस्तिकां भेटयतले.
अदीक माहिती खातीर सर्तीचे संयोजक हृषिकेश कदम हांकां 7774022626 वा सह-संयोजक पलाश अग्नी हांकां 7350426399 ह्या क्रमांकाचेर संपर्क करचो.
