कोंकणी भाशा मंडळ गोंय आयोजीत 24वे शणै गोंयबाब कथामाळ सर्तीची जिल्लो आनी राज्य पांवड्या वयली फेरी 10 ऑगस्टाक मडगांवां कोंकणी भवनांत सकाळीं जातली. गोंयभरच्या 19 केंद्रांचेर वेंचिल्ले सुमार 125 सर्तक जिल्लो फेरयेंत वांटो घेतले. ते उपरांत दनपरां राज्य फेरी जातली.
कथामाळ सर्तींत अंदूं नवो विक्रम केला. एकाच दिसा 19 केंद्रांचेर जाल्ले हे सर्तींत गोंयभरच्यान 1226 सर्तकांनी वांटो घेतला. अंदूं धारबांदोडें, सांगें, काणकोण, सत्तरी, दिवचल, पेडणें, बार्देश ह्या म्हालांतल्यान खूब बरो प्रतिसाद लाबलो. शिरोडें ह्या नव्या केंद्राचेर 60 सर्तक वांटेकार जाले. कथामाळ सर्तीक मेळिल्लो हो प्रतिसाद कोंकणी भाशेचें म्हत्व आतां तळागळांतल्या लोकांक समजुपाक लागलां हें दाखोवन दिता अशें मंडळाची अध्यक्ष रत्नमाला दिवकार हांणी सांगलें.
ही सर्त जैतीवंत करूंक संयोजकांनी, सहसंयोजकांनी तशेंच सहआयोजकांनी आनी आपवावुरप्यांनी खूब तकालस घेतली. शिक्षण खातें, गोंय एस.सी.ई.आर.टी. आनी ए.डी.ई.आय. कार्यालयांतल्यान खूब मोलादीक हातभार लाबलो अशें कथामाळेचे मुख्य संयोजक उल्हास गांवकार हांणी सांगलें. सर्तींत सुमार 171 परिक्षक आनी 250 आपवावुरप्यांनी आनी जोड आयोजक संस्थांनी आदार दिलो अशें उपसंयोजक गौरांग भांडीये हांणी स्पश्ट केलें.
