सरकारी नोकऱ्यां खातीर कोंकणी भाशेचें लिखीत गिन्यान सक्तीचें करपाचो जो निर्णय गोंय सरकारान घेतला, ताका कोंकणी भाशा मंडळ आनी अखिल भारतीय कोंकणी परिशद पुरायपणान तेंको दिता. सर्वोच्च न्यायालयान हालींच दिल्ल्या एका निर्णया प्रमाण सरकारी नोकरी मेळचे खातीर घाल्ली राबितो दाखल्याची अट काडून उडयिल्ल्यान कोंकणी भाशेच्या गिन्यानाची सक्ती भोव गरजेची जाल्या.
सरकारान नोकऱ्यां खातीर कोंकणी भाशेच्या गिन्यानाची सक्ती शिथील केल्यार महाराष्ट्र आनी हेर राज्यांतल्या धा कोटींच्या लागीं जनता सरकारी नोकऱ्यां खातीर पात्र थारतली, हाचो विचार करून वयलो निर्णय आनिकूय प्रभावीपणान कसो लागू करप शक्य आसा ताचेर सरकारान लक्ष केंद्रीत करप गरजेचें आसा.
मराठी भाशीक समर्थकांच्या दबावाक बळी पडून सरकारान आपल्या धोरणांत बदल केल्यार गोंयांतल्या हजारांनी बेरोजगारांचेर ताचो परिणाम जातलो आनी अशा बदलाक कोंकणी भाशा मंडळ आनी अखिल भारतीय कोंकणी परिशदेचो सक्त विरोध आसतलो. गरज पडल्यार अश्या बदलांक विरोध करपा खातीर गोंयांतले जनतेक एकठांय करून आंदोलन उबारपा खातीर कोंकणी भाशा मंडळ आनी अखिल भारतीय कोंकणी परिशद फाटी सरचीं नात, असो इशारो रत्नमाला दिवकार आनी परिशदेचे कार्याध्यक्ष चेतन आचार्य हांणी दिला.
कोंकणीचें ज्ञान तपासूंक परिक्षा घेवपाच्या सरकाराच्या निर्णयाचें स्वागत करूंक घेतिल्ली जोड पत्रकार परिशद, मडगांवच्या कोंकणी भाशा मंडळांत जाली.