गांवांनी जावपी विधवा प्रथा बंद करपाच्या कोरगांव, धारगळ तशेंच शिरोडें पंचायतीन घेतिल्ल्या निर्णयाक कोंकणी भाशा मंडळ, गोंय हांणी येवकार दितनाच ह्या पंचायतींक परबीं भेटयल्या. कोंकणी भाशा मंडळाच्या ‘चित्रंगी’ ह्या बायल आनी तरणाट्यां खातीर ओंपिल्ल्या विभागान ह्या क्रांतिकारी निर्णयाक येवकार दितना ह्या पंचायतीचे पंच, सरपंच तशेंच थाराव मांडपी व्यक्तिंचें अभिनंदन केलां.
महाराष्ट्रांतल्या कोल्हापूर जिल्ल्यांतल्या हेरवाड ग्रामपंचायतीन विधवा प्रथा बंद करपाचो निर्णय घेतले उपरांत ह्या विशयाक गती मेळिल्ली. ते उपरांत महाराष्ट्र सरकारान सगळ्याच पंचायतींक असो निर्णय घेवपाचें परिपत्रक जाहीर केल्ले. हेच फाटभुंयेर गोंयांतल्याय कांय पंचायतींनी अशा प्रकारचो निर्णय आयतारा जाल्ल्या ग्रामसभेंत घेतलो ही भोव उर्बादिणी गजाल आसा अशें मंडळाची अध्यक्ष अन्वेषा सिंगबाळ हांणी म्हणलां.
गोंयांत आयजूय कांय वाठारांनी घोव मेले उपरांत बायलांक विधवा संस्कार करचे पडटात. तांचें मंगळसुत्र बळजबरीन काडप, कांकणां फोडप, तांची व्होटी भरप आनी ते उपरांत तिचें कुकूम पुसप अश्या तरेच्यो विधी आयजूय गांवांनी जातात. ह्यो विधी बायले खातीर खूब अपमानास्पद आसात. पयलींच घोवाच्या मरणान दुख्खी जाल्ले बायलेक अश्या तरेच्यो विधी करपाक लावप म्हणल्यार तिच्या आत्मसन्मानाक दुखोवप. बायलांक कमी लेखपाचे हे प्रकार आसात आनी ते खातीर ते बंद जावपाक जाय.
घोवाच्या मरणान बायलेचें अस्तित्व इल्लेंय कमी जायना वा सोंपना. मुळांत बायलेचें एक मनीस म्हणून अस्तित्व आसा, वळख आसा. लग्न हो दर एकल्याच्या जिविताचो एक म्हत्वाचो पांवडो आसलो तरीय तातूंत बायलांक दुय्यम स्थान दिवपाचो तो संस्कार न्ही हें ह्या समाजान आतां मानून घेवपाक जाय अशें ह्या प्रसिध्दी पत्रकांत म्हळां.
गोंयांतल्या कांय गांवांनी अशा प्रकारचे विधवा संस्कार हाचे आदींच बंद केल्यात. हेर पंचायतींनीय मुखार येवन अशे तरेचो निर्णय घेवचो अशें आवाहन मंडळान केलां. ह्या संबंदान गोंय सरकारानय लक्ष घालून गरज आसल्यार फावोसो कडक कायदो चालीक लावचो आनी सगळ्या पंचायतींक अशे तरेचे निर्देश दिवचे अशेंय मंडळान मागलां. गोंयांत हे विशीं जनजागृताय घडोवपाक मंडळ आनी मंडळाचो ‘चित्रंगी’ विभाग पुराय यत्न करतलो अशें मंडळान म्हळां.
पेडणेचे आमदार भौ. प्रवीण आर्लेकार, मुख्यमंत्री डॉ. प्रमोद सावंत हांची घरकान्न भौ. सुलक्षणा सावंत तशेंच गोंयातल्या हेर राजकीय तशेंच सामाजीक स्थरावेल्या व्यक्तिंनी ह्या महत्वाच्या निर्णयाक येवकार दिला. मंडळान तांकांय परबीं भेटयल्या.
