गोवा कोंकणी अकादेमी आयोजीत दोन दिसांचें 23वें युवा कोंकणी साहित्य संमेलन अंदू वर्सा मिरामारच्या व्ही. एम्. साळगांवकार कायदो महाविद्यालयाच्या जोड पालवान घडोवन हाडटात. 17 फेब्रुवारी, 2024 ह्या दिसा सकाळीं 10 वरांचेर हैदराबाद, तेलंगनाची नामनेची कवियत्री, कथाकार आनी नाटककार मर्सी मार्गारेट, ही 23व्या युवा कोंकणी साहित्य संमेलनाचें उद्घाटन करतली.
ह्या वेळार गोंय विद्यापिठाच्या शणै गोंयबाब भाशा आनी साहित्य महाशाळेचे सहाय्यक प्राध्यापक आनी काणकोण म्हालांतले युवा लेखक तशेंच केंद्रीय साहित्य अकादेमीचो युवा साहित्य पुरस्कार लाबिल्ले डॉ. हेमंत बाळकृष्ण अय्या हांकां ह्या वर्साचो प्रतिश्ठेचो मेघश्याम नायक यादस्तीक ‘युवा साहित्य पुरस्कार’ भेटयतले. डॉ. अय्या हांचो कथाकार (कथा संग्रह), पोकळ (कविता संग्रह), कांय कन्फ्युज्ड कविता (कविता संग्रह) पुस्तकां प्रकाशीत जाल्यात. पथनाट्य हो तांचो आवडीचो विशय आशिल्ल्यान आतां मेरेन तांणी 50 परस चड पथनाट्य बरयल्यात आनी गोंयच्या विवीध वाठारांनी आपल्या पंगडाक घेवन सादर केल्यात. ‘मोगा म्हज्या’ ह्या कोंकणी गितांच्या आल्बमाक 2016 वर्साचो उत्कृश्ट गीत लेखनाचो पुरस्कार तांकां फावो जाला. तांणी कोंकणी भाशे खातीर दिल्ल्या योगदाना खातीर आनी तांच्या एकंदरीत कार्याची दखल घेवन गोवा कोंकणी अकादेमीचो अंदू वर्सा खातीर ‘युवा साहित्य पुरस्कार’ फावो जाला.
23 व्या युवा कोंकणी साहित्य संमेलनाची संमेलनाध्यक्ष म्हूण अन्वेषा सिंगबाळ, येवकाराध्यक्ष म्हूण ज्ञानेश्वर पेडणेंकार आनी कार्याध्यक्ष म्हूण सहाय्यक प्राध्यापक मेघना कापडी हांची निवड जाल्या. पुराय कार्यावळीक गोवा कोंकणी अकादेमीचे प्रभारी अध्यक्ष वसंत भगवंत सावंत आनी सचीव मेघना शेटगांवकार उपस्थीत आसतली.
युवा लेखकांची पुस्तक प्रकाशनां
उक्तावण सुवाळ्या वेळार सारिका नायक हांचो ‘हावेस’ कविताझेलो आनी युवांकूर – ह्या फाटल्या वर्साच्या जैतिवंत सर्तकांच्या साहित्यकृतींचो झेलो गोवा कोंकणी अकादेमी लोकार्पण करतली. तशेंच ‘पडवेर’ ह्या सत्रांत उर्वशी नायक आनी आकाश गांवकार, कोंकणी साहित्यकार तुकाराम शेट आनी ज्योती कुंकळकार हांची मुलाखत घेतलीं. गोवा कोंकणी अकादेमीचे संशोधन सहाय्यक तशेंच युवा लेखक दत्तराज उर्फ दत्तू नायक आनी सहाय्यक प्राध्यापक पुर्वा वस्त हीं युवा साहित्य पुरस्कार जैतिवंत डॉ. हेमंत अय्या हांची मुलाखत घेतलीं.
मूळस्वर उलोवप आनी कार्यशाळा
प्राचार्य डॉ. भूषण भावे हे मूळस्वर उलोवप करतले. ताचे उपरांत प्रतिनिधीं खातीर कविता, कथा, ब्लॉगींग आनी बालसाहित्य ह्या चारूय विभागांच्यो कार्यशाळा सुरू जातल्यो. डॉ. पुर्णानंद च्यारी, साईश पाणंदीकार, रमेश साजू घाडी, डॉ. प्रकाश पर्येंकार, सुशांत नायक, डॉ. तन्वी कामत बांबोळकार, स्नेहा सबनीस, युगांक नायक, प्रवीण सबनीस, दिनेश मणेरकार, रत्नमाला दिवकार, कवींद्र फळदेसाय हे गोंयचे नामनेचे लेखक विद्यार्थ्यांक आनी तरणाट्यां प्रतिनिधींक मार्गदर्शन करतले. साहित्य सादरीकरण ह्या सत्रांत अद्वैत साळगांवकर, गौरांग भांडिये, आकाश गांवकार, महादेव गांवकार, पलाश अग्नी, फा. मिल्टन, डॉ. हेमंत अय्या, रिया बेंगलोरकर, सारिका नायक, ममता वेर्लेंकार, विश्वप्रताप पवार, गोविंद मोपकार, मानसी धावस्कार, नलीश वेळीप आनी परेश च्यारी हे वांटेकार जातले.
गोंयभरांतले सुमार 200 विद्यार्थी आनी तरणाटे प्रतिनिधीं त्या भायर हेर म्हालगडे लेखक, शिक्षक आनी युवा लेखक ह्या संमेलनांत वांटो घेतले.
मर्सी मार्गारेट ही हैदराबाद, तेलंगनाची नामनेची कवियत्री, कथाकार आनी नाटककार. छापील आनी डिजीटल माध्यमा वरवीं उजवाडाक आयिल्ल्यान तांच्यो कविता प्रसारीत जाल्यात. 2017 वर्सा तांकां ‘मताला मदुगु’ ह्या तांच्या पयल्याच कविता झेल्याक युवा साहित्य पुरस्कार फावो जाला. साबार मळांचेर फिशालकायेन नामना मेळोवपी वाणिज्य आनी वेवसाय प्रशासन फांट्यांतल्यान दोट्टी पदवी संपादन करपी मर्सी मार्गारेट ही एक भोव आयामी व्यक्तीमत्व. राज्य पांवड्या वयल्या तशेंच राष्ट्रीय मळार तांचे साहित्यीक वावराची तोखणाय जाल्या.
