राजभाशा संचालनालय तशेंच गोंय सरकाराच्या हेर खात्यांच्या आनी स्वायत्त संस्थांच्या येवजण्यांचो लाव घेवचो आनी कोंकणी तशेंच हेर भाशांच्या प्रचार आनी प्रसारा खातीर दरेकल्यान वावर करचो अशें कोंकणी लेखक, प्रकाशक आनी शिक्षक झिलू गांवकार हांणी सांगलें. सरकारी कामकाज कोंकणींतल्यान चलचें म्हणून राजभाशा संचालनालय सरकारी कर्मचार्यांक कोंकणी प्रशिक्षण दिता, आतां नागरिकांनी कोंकणींतल्यान पत्रवेव्हार करपाची गरज आसा अशें तांणी मुखार सांगलें.
सेवा पखवाडा निमतान राजभाशा संचालनालय आनी खांडोळेंच्या सरकारी म्हाविद्यालयान जोड पालवान येवजण्यांची जागृती घडोवन हाडपी कार्यावळ आयोजीत केली. हे कार्यावळीच्या उक्तावण सुवाळ्याक झिलू गांवकार मुखेल सोयरे आशिल्ले. गोंयचे मुख्यमंत्री आनी राजभाशा मंत्री डॉ. प्रमोद सावंत हांच्या मार्गदर्शना खाला ही कार्यावळ जाली.
खांडोळें सरकारी म्हाविद्यालयाच्यो उपप्राचार्य प्रो. डॉ. सीमा साळगांवकार हांणी सगळ्यांक येवकार दिलो. आमचे भाशेचें जतन आमीच करूंक जाय अशें प्रो. साळगांवकार हांणी सांगलें. डॉ. रघुनाथ माशेलकार हे माशेलांतले. आपले भाशेंतल्यान मुळावे शिक्षण घेवन इतल्या वयल्या स्तरा मेरेन वचूं येता हाची देख तांचे कडल्यान मेळटा अशें राजभाशा संचालक मेघनाथ परब हांणी सांगलें.
राजभाशा संचालनालयाच्या आमचो गांव, आमची परंपरा आनी आमचें दायज, भाशा विकास योजना, भाशा पुरस्कार योजना अश्या साबार येवजण्यांची माहिती उपसंचालक अनिल सावंत हांणी दिली. उपरांत संचालनालयांत चलपी अणकाराच्या कामाची माहिती दिवन भारतांत अणकारा खातीर आशिल्ल्या संदींचेर वरिश्ठ अनुवादक सेबी फर्नांडीस हांणी उजवाड घालो. ते उपरांत, शब्दावली निर्मिती आनी गिन्यान संबंदीत पुस्तकांचो कोंकणी अणकार हाचेर कनिश्ठ अनुवादक स्नेहा सबनीस हांणी उलोवप केलें.
उपसंचालक अनिल सावंत हांणी सगळ्यांचे उपकार मानले. हे कार्यावळीचे सुत्रसंचालन कोंकणी प्राध्यापक किरण पालकार आनी हिन्दी प्राध्यापक सची नायक हांणी केलें. कार्यावळीक विद्यार्थी, शिक्षक आनी पालक हाजीर आशिल्ले.
