गोंय सरकाराच्या राजभाशा संचालनालयान सरकारी कर्मचार्यां खातीर आयोजीत केल्ल्या प्रशिक्षणाचे 7 वे बॅचीक 16 सप्टेंबर सावन भाशा संशोधन केंद्र, राजभाशा संचालनालय, जुंता हावस, पणजी हांगा सुरवात जाली. हे प्रशिक्षण कार्यावळीच्या उक्तावण सुवाळ्याक मुखेल सोयरे म्हूण भौशीक तक्रार खात्याचे संचालक प्रसाद वळवयकार हाजीर आशिल्ले.
हे प्रशिक्षण कार्यावळीचो चडांत चड लाव घेवचो तशेंच कोंकणी भाशेचो प्रशासकी कामकाजांत वापर करचो अशें तांणी आपल्या उलोवपांत सांगलें. कोंकणींतलीं उतरां वापरिनात जाल्यार लुप्त जातलीं अशें तांणी फुडें सांगलें.
ह्या वेळार राजभाशा संचालक श्री. मेघनाथ परब तशेंच राजभाशा उपसंचालक श्री. अनिल सावंत हाजीर आशिल्ले. प्रशासनांत राजभाशेचो चडांत चड वापर जावचो म्हणून हें संचालनालय वावर करता अशें संचालक मेघनाथ परब हांणी सांगलें.
चार दिसांच्या ह्या प्रशिक्षणांत 28 सरकारी कर्मचारी वांटेकार जाल्यात. ह्या प्रशिक्षणांत कोंकणी व्याकरण, कोंकणी भाशेंतल्यान पत्रवेव्हार, कोंकणींत टिपण बरोवप, प्रशासकी उतरावळ आनी संवाद हांचो आसपाव आसा.
हें प्रशिक्षण 16 ते 19 सप्टेंबर 2025 ह्या दिसांनी सकाळीं 9.30 ते सांजे 5.00 मेरेन चलतले.
मजगतीं, 8 वे बॅचीचें प्रशिक्षण 22 ते 25 सप्टेंबर मेरेन भाशा संशोधन केंद्र, राजभाशा संचालनालय, 5 वो माळो, जुंता हावस, पणजे सकाळीं 9.30 ते सांजे 5.00 मेरेन आसतले.
