लेखक आनी समिक्षक सखाराम बोरकार हांकां ह्या वर्साचें स. पद्मजा माणिकराव गावणेकार यादस्तीक प्रपत्र लेखन सर्तीचें इनाम फावो जाला.
कोंकणी भाशा मंडळ आयोजीत ही सर्त जेश्ठ लेखक आनी कोंकणी कार्यकर्ते भो. माणिकराव गावणेकार हांणी फाटलीं कांय वर्सां आपल्या सर्गेस्त घरकान्नीच्या यादीन पुरस्कृत केल्या. अंदू वर्साय हे सर्तीक बरो प्रतिसाद मेळ्ळो. डॉ. किरण बुडकुले, डॉ. हनुमंत चोपडेकार आनी डॉ. भूषण भावे हांणी हे सर्तीचें परिक्षण केलें.
कोरोना महामारीची समस्या उणी जाल्या उपरांत कोंकणी भाशा मंडळ एक खाशेली कार्यावळ आयोजीत करून हें इनाम तांकां भेटयतलें अशें मंडळान उजवाडायल्ल्या प्रसिद्धी पत्रका वरवीं अध्यक्ष अन्वेषा सिंगबाळ हांणी म्हणलां.
मडगांव रावपी सखाराम बोरकार हे भोवराष्ट्रीय कंपनीतल्यान अधिकारी म्हणून निवृत्त जाल्यात. कवी, कथाकार, निबंदकार, अणकारपी, समिक्षक अशें तांचें भोवआयामी व्यक्तिमत्व. ‘अथ्रेक’ आनी ‘तूं’ हे तांचे दोन कविता संग्रह प्रकाशीत जाल्यात. फाटलीं साबार वर्सां ते कोंकणी म्हणी आनी वाक्प्रचारांचे संकलन आनी संशोधन करतात. ते सातत्यान दिसाळ्यांत तशेंच मासिकांनी लेखन करतात.
