मडगांव: कोंकणी भाशा मंडळ संचालीत विद्याभुवन कोंकणी शाळेच्या पालक शिक्षक संघाची बसका कोंकणी भवनांत आयोजीत केल्ली. ह्या वेळार पालक शिक्षक संघाचे समितीच्या अध्यक्षपदार स्मिता आळवे हांची नियुक्ती जाली, जाल्यार उपाध्यक्ष म्हूण शशिराज नायक शिरोडकार आनी प्रिया नायक. भांडारी अंकुश गांवस देसाय, सचीव शिक्षक विशाल शेणवी खांडेपारकार तशेंच वांगडी म्हणून समीर अवदी, लालन पार्सेकार, दिक्षा पै रायतुरकार, ऐश्वर्या कुडतरकार, श्वेता च्यारी आनी मुख्याध्यापिका अक्षता व्यास हांची नियुक्ती जाली.
हे बसकेक विद्यालयाच्या पालक शिक्षक संघाचे आदले अध्यक्ष प्रसाद रायकार हांणी येवकार दिलो. ह्या वेळार पालक शिक्षक संघाच्या फाटल्या बसकेचो नियाळ, वर्सुकी अहवाल, वर्सुकी हिशोब हांची मान्यताय घेतली आनी पालकांच्यो शाळे संबंदी सुचोवण्यो घेतल्यो.
विद्याभुवन कोंकणी शाळेचे शिक्षक सदांच शिक्षणाच्या वेगवेगळे मळांर वावर करतात. आमची शाळा ह्या कोविड काळांत लेगीत शाळेंत कार्यावळी घडोवन हाडटात. तशेंच भुरग्यां खातीर ऑनलायना वरवीं उपक्रम, प्रदर्शनां आनी सर्ती राबयतात. भुरगीं सदांच व्यस्त उरप हींच आमची मोख आसता अशें शाळेचे अध्यक्ष चेतन आचार्य हांणी सांगलें.
आदल्या पालक शिक्षक संघाच्या वावराची तोखणाय करून कोंकणी भाशा मंडळाच्यो अध्यक्षा अन्वेषा सिंगबाळान म्हणलें- सदांच शाळा जे प्रयोग करतात, तातूंत भुरगो हो केन्द्रीत आसता. तेन्ना हो आमचो वावर असोच चालू उरतलो म्हणपाचें भौ.सिंगबाळ हांणी सांगलें.
जिणेंत इनामां म्हत्वाची नासतात. जाल्यार भुरग्यांनी माचयेर येवन आपली कला सादर करप गरजेचें आसता. सदांच पालकांनी सतर्क रावन जबाबदार पालक जावंक जाय. फुडारांत पालकांनी आपल्या एकाच भुरग्याचो विचार करनासतना सदांच शाळेंतल्या सगल्यां भुरग्यांचो विचार करचो. तेन्नाच भुरग्यांमदीं एकचाराची भावना रुजतली म्हणपाचें भौ. अनंत अग्नी हांणी सांगलें.
शिक्षिका अपेक्षा मांजरेकार हिणें पालकांक शाळे संबंदीत कांय सुचोवण्यो केल्यो. सुत्रसंचालन शिक्षक विशाल शेणवी खांडेपारकार आनी शिक्षिका अक्षया फळदेसाय हांणीं केलें. उपकार भौ.स्मिता आळवे हांणी मानले.
