हालीच्या तेपार युट्यूब हे समाज माध्यमाचेर प्रदर्शित जाल्ल्या ” मोरूलो” हे सर्वण, दिवचल हांगचे लोकगीत सध्याक बरेच गाजता. गोयचे नामनेचे गायक मुकेश घाटवळ हाणी फ्युजन संगीताचो खुबीन वापर करून आधुनिक साज दिल्ल्या हे गीताक ३ हजार ७३१ गोयकार संगीत मोगी लोकांनी पळयिल्ले आसा. २१ जुलै २०२४ हे दिसा प्रदर्शित जाल्ल्या हे गीताक मेळपी प्रतिसाद चढत्या क्रमात वयर वयता अशे पळोवंक मेळटा.
” लाईव्ह न्यूज गोवा” चे प्रतिनिधीन घाटवळ हांचेकडेन हे गीताविशी उलोवप केले तेन्ना घाटवळ हाणी हे गीता फाटली फाटभूय उक्ती केली. दिवचल तालुक्यात आशिल्ल्या सर्वण हे गावात स्थानिक शेतकार, लोक आनी तरणाटे फाटली जायती दसकां हे गीत, लोकगीत आनी लोकनृत्य हे प्रकारात सादर करतात. हे लोकगीताक आधुनिक वाद्यां, संगीत आनी साज दिवन ते नव्या ढंगान आनी आपलो आवाज वापरून आयकुप्यां मुखार दवरपाचे आपणेन थारायलें.
हे मुळावे लोकगीत ” मोरूलो” तयार करतना ताचो भाव वा ‘ फिल’ तसोच दवरून संगीत, शैली, आधुनिक पद्धतीची वापरून ” फ्युजन ” प्रकारात करपाचे, असो विचार केलो, घाटवळ म्हणटात. हे गीत तीन वर्सा पयली तयार करून जाल्ले. पुण तेन्ना ते उजवाडाक हाडुंक पावलेना. आयज योग्य असो खीण येयले उपरांत ते रिलीज केला, अशे घाटवळ म्हणटात.
लोकगीताचो वापर करून फ्यूजन गीत करपाची आपली ही पयलीच फावट न्हय तर हांचेपयली रणमाले, देखणी, सत्तरी वाठरातले शेतकार हांची लोकगीतां वापरून फ्युजन गीतां आपणेन केल्या, अशे तांचे म्हणणे आसा. “फोक सिंथेसिस” हे आपले पंगडाक घेवन ताणी मत्स्य महोत्सवाक (फिश फेस्टीव्हल ) गोंयची लोकगीतां ” फोक फ्युजन साँग ” हे पद्धतीन सादर केल्ली आसात, अशेय बी घाटवळ हाणी सांगले.
‘पंजाबी आनी गुजराती लोकगीतांचे धर्तीचेर करपाचे थारलें प्रयोग’
घाटवळ फुडें म्हणटात, मोरूलो हे लोकगीतांचे फ्युजन करपाचो विचार पंजाबी आनी गुजराती लोकगीतां आधुनिक साज दिल्ल्यां स्वरूपात पळोवपाक मेळी, तेन्ना सुचलो. आमी सगल्यांनी ती पळयल्यात, ते राज्यातल्या लोकांसयत बाकीचे हेर राज्यातले कोट्यानी लोकांनी ही गीतां पळोवन तांचो आस्वाद घेतला.
घाटवळ म्हणटात, लोकवाद्यां, जशी की घुमट, शामेळ, कासाळे जी पारंपरिक वाद्यां आसात, तांचो वापर करतना आधुनिक वाद्यां म्हटल्यार ड्रम, बाझ गिटार आनी सिंथेसायझर हांचोय वापर करून फ्युजन वाद्यांचो एक मेळ सादपाचो यत्न आमी केल्लो आसा.
स्थानीक कलाकारांचो असो आसा आस्पाव
ही संकल्पना सेलेस्ता सालढाणा हांची आसा. मुखेल गावपी, संगीत निर्मिती, ध्वनीमुद्रण, मिश्रण (मिक्सिंग) मुकेश घाटवळ हांचे तर डिओपी, ड्रोन चित्रीकरण, संपादन कल्पित गावकर हाणी सांबाळील्ले आसा. गीतात केल्ले सुंदर लोकनृत्य गोयचे ” लोकरंग कुडचडे ” हे स्थानिक वेवसायिक लोकनृत्य पंगडान सादर केला. आश्विन कार्दोज (गिटार ), जोनाथन डायस (ड्रम वाद्य), रोलांड अफॉन्सो (घुमट), रेमी अफॉन्सो (की बोर्ड ) आनी पलाश घाटवळ (बाल कलाकार) हे साबार वादक आनी कलाकार आमका हे म्युझिक व्हिडिओत पळोवंक मेळटा.
🖋️
(सनतकुमार फडते)
