लेखक आनी कोंकणी कार्यकर्ते अन्वेषा सिंगबाळ हांच्या ‘आसोर’ आनी ‘चांफो’ ह्या कविता संग्रहांचो लोकार्पण सुवाळो 2 एप्रीलाक जातलो. मडगांवच्या रवींद्र भवनाच्या कॉन्फरन्स सभाघरांत सांजेच्या 5 वरांचेर हो सुवाळो जातलो. ह्या सुवाळ्याक लेखक आनी कोंकणी कार्यकर्तो भौ. चेतन आचार्य अध्यक्ष म्हूण हजर रावतलो. जाल्यार जेश्ठ साहित्यकार भौ. मेल्वीन रॉड्रिगीश मुखेल सोयरो म्हूण हजर रावतलो. लेखक आनी लोककलाकार भौ. गोपिनाथ गांवस मानाचो सोयरो म्हूण हजर रावतलो. हें पुस्तक संजना पब्लिकेशन्साच्या वतीन प्रकाशीत जाता. सुवाळ्याचें सुत्रसंचालन लेखक आनी शिक्षक भौ. ब्रिजेश शेट देसाय करतलो.
अन्वेषा सिंगबाळ हाचे हे तिसरे आनी चवथे कवितांचे संग्रह. ताणें पिरायेच्या 12व्या वर्सा सावन लिखाणाक सुरवात केली. ‘सुलूस’ हो ताचो पयलो कविता झेलो 2011 वर्सा प्रकाशीत जालो जाल्यार ‘पडसाद’ हो कविता झेलो 2016 वर्सा प्रकाशीत जालो. ‘दांत’ हें बाल काणयेचें पुस्तक 2017 वर्सा प्रकाशीत जालें. सुलूस कविता झेल्याक 2016 वर्साचो केंद्रीय साहित्य अकादेमी, नवी दिल्लीचो युवा साहित्य पुरस्कार फावो जाला. कोंकणी भाशा मंडळ, गोंय हे कोंकणी खातीर वावुरपी आद्य बिगर सरकारी संस्थेचें 2020-2023 वर्साचें तें अध्यक्ष आसा.
ह्या लोकार्पण सुवाळ्याक सगळ्या साहित्य रसिकांनी मोट्या संख्येन हजर रावचें असो उलो संजना पब्लिकेशन्साचे दिनेश मणेरकार आनी लेखक अन्वेषा सिंगबाळ हांणी मारला.
