शैलेंद्र मेहता गोयचें साहित्य मळावेले वैभव – आदले केंद्रीय कायदे मंत्री रमाकांत खलप हांचे गौरवान भरलेले उदगार

^{मेहता हांचे तीन पुस्तकांचे वेलिंग हांगा एकठाय प्रकाशन}

” अभिजात” हे साहित्यकृतीचे माध्यमातल्यान कोकणी आनी मराठी साहित्यिक तशेच कवी शैलेंद्र मेहता हाणी जागतिक दर्जाचे लेखकांची वळख गोयचे वाचकांक करून दिल्या. ते दृष्टीन मेहता हे गोयचे साहित्य मळावयले एक व्हड वैभव वा मोलादीक संपत्ती जावन आसा, अशें गौरवाचे उदगार गोयचे आदले केंद्रीय कायदे मंत्री रमाकांत उर्फ भाई खलप हाणी काडले. मेहता हांचे ‘ विजनवासांतलो भोवंडेकार’ हो कोकणी कवितासंग्रह, ‘ शीमेपलतडचे दायज’ हे कथांचो अणकार केल्लो कथासंग्रह या कोकणी पुस्तकांचो आनी ‘ अभिजात ‘ या मराठी पुस्तकाचो, अशें मिळून एकूण तीन पुस्तकांचो प्रकाशन सुवाळो फोंडेचे गावठण, वेलींग हांगा लोककलाकार कांता गावडे हांचे शालिनी सपन हे निवास स्थानाचेर एक व्हड दबाज्यान जाल्ले कार्यक्रमात जाले. 

संजना पब्लिकेशन आनी रंगमेळ, वेलिंग या संस्थेच्या जोडपालवान आयोजित केल्ल्या या ग्रंथ उजवाडावपाचे कार्यक्रमात मुखेल सोयरे म्हूण रमाकांत खलप, मानाचे सोयरे म्हूण कला दिग्दर्शक सुशांत तारी आनी वर्णमुद्रा प्रकाशन संस्थेचे प्रकाशक मनोज पाठक हे खासा उपस्थित सोयरे म्हूण व्यासपीठाचेर हाजीर आशिल्ले. व्यासपीठाचेर मराठीतले साहित्य समीक्षक दीपक बोरगावे, शिक्षणतज्ञ नारायण देसाई, लोक कलाकार कांता गावडे, नारायण देसाय, राजश्री सैल आनी सूत्र निवेदक प्रवीण सबनीस हाजीर आशिल्ले.

खलप हाणी उलयतना गोयचे मराठी आनी कोकणी लेखक आनी कवी  हांचे साहित्याची वळख भुरग्यांक जावची म्हूण ताचेर निबंध बरोंवंक प्रोत्साहन दिवचे, असो म्हत्वाचो विचार मांडलो. शिक्षणतज्ञ नारायण देसाय हाणी सगले जागतिक लेखक ह्या ग्रंथात एकठाय वाचकांक मेळटात, जी एक पर्वणी आसा, अशें म्हटले.

प्राध्यापक दिपक बोरगावे हाणी ” अभिजात ” हें पुस्तकाचेर उलयतना पत्रकार आनी प्राध्यापक हांचेमदी पत्रकार हो खरो लेखक आसता, कारण कितें बरोवचे हें पत्रकाराक कळटा अशे मत उक्तायतना भौतिकवाद, अभिजातवाद आनी अस्तित्ववाद हांचेविशीं आपले साहित्यिक मुद्दे दवरलें. ” विजनवासांतलो भोवंडेकार ” हे कविता संग्रहाचेर उलयतना राजश्री सैल हाणी सांगले, कवीन केल्ली भोवंडी चिंतनशील आसा, तशेच मनान कळवळो आसा, जीवितांतली घुसमट कवीक व्यथित करता. मेहता हाणी आपले साहित्याचेर उलयतना वाचन करून चिंतन, मनन जावपाक जाय तशेच कथा जीणेचो वेगळो वेध दिता, अशे मत व्यक्त केले.

शैलेंद्र मेहता हांचे ग्रंथ प्रकाशन कार्यक्रमांत तालवाद्य सादरीकरण करून आंतरराष्ट्रीय मळावयले तालवाद्य कलाकार बोंडो हाणी कर्यावळीक एक वेगळीच रंगत हाडली.

पुस्तकाचे मुखपृष्ठ करपी तशेच लेआऊट डिझायन करपी विली गोयश, हृषिकेश आठवले आनी हर्ष कामत हांचोय हे वेळार भोवमान जालो. कांता गावडे हाणी आभार मानले.

साहित्य अकादमी पुरस्कार विजेते कोकणी लेखक प्रकाश पर्येकार हांचो हे वेळार भोवमान मानेस्तांनी केलो.

🖋
(सनतकुमार फडते)