कोंकणी भाशा मंडळ, गोंयची स. मनोहरराय सरदेसाय यादस्तीक ‘पेटूल’ ही बाल गितांची, बाल साहित्याची आनी शिक्षणीक साहित्याची कार्यावळ 27 जूनाक मडगांवां रवींद्र भवनांतल्या पाय तियात्रिस्त सभाघरांत सांजेच्या 4.00 वरांचेर जातली. कोवीड महामारी आशिल्ल्यान सुमार दोन वर्सां उपरांत ही कार्यावळ जाता. मंडळान निर्मणी केल्ल्या बाल साहित्याच्या पुस्तकांचें तशेंच ‘शाणी मस्ती 7’ हे सिडीचें लोकार्पण हे कार्यावळींत जातलें, अशी माहिती मंडळाची अध्यक्ष अन्वेषा सिंगबाळ हांणी दिली.
पेटूल कार्यावळीक धेंपो ग्रूप ऑफ कंपनीजचे चॅरमॅन भौ. श्रीनिवास धेंपो मुखेल सोयरे म्हणून हाजीर आसतले. जेश्ठ साहित्यीक भौ. तुकाराम शेट, पर्यावरणप्रेमी भौ. राजेंद्र केरकार, गोंय शालांत मंडळाचे चॅरमॅन भौ. भगिरथ शेटये, गोंय समग्र शिक्षाचे राज्य प्रकल्प संचालक डॉ. एस. एस. घाडी, रोझरी महाविद्यालय प्रशासक फा. गेब्रिएल कुतिन्हो, स्कूप इंडस्ट्रीजच्यो संचालक डॉ. संजीता संजीव नायक आनी भौ. सांघवी संजीव नायक हे मानाचे सोयरे म्हणून कार्यावळीक उपस्थीत रावतले, अशें मंडळाच्या वावुरपी समितीच्यो वांगडी रत्नमाला दिवकार हांणी सांगलें.
ह्या वेळार लिटल्स प्री प्रायमरी अॅण्ड प्रायमरी स्कूल, मडगांव, फातिमा कॉन्वॅण्ट हाय स्कूल, मडगांव, रवीन्द्र केळेकार ज्ञानमंदीर, मडगांव, विद्याभुवन कोंकणी शाळा, मडगांव, होली रोझरी कॉन्वॅण्ट हाय स्कूल, नुवें, विवेकानंद ज्ञानमंदीर, केरी, सत्तरी आनी महिला अॅण्ड नुतन इंग्लीश हाय स्कूल, मडगांव ह्या विद्यालयांचे विद्यार्थी शाणी मस्ती सिडींतल्या गितांचेर नाच सादर करतले.
शाणी मस्ती सिडी तशेंच बाल साहित्य आनी शिक्षणीक साहित्य निर्मुपा खातीर मोलादीक हातभार लायिल्ल्या वेगवेगळ्या लेखक, कलाकार, अनुवादक, संगीतकार, गायक हांचो भोवमान जातलो, अशें मंडळाचे सचीव उल्हास गांवकार हांणी सांगलें.
मंडळान फाटल्या साबार वर्सांत विद्यार्थ्यां खातीर शाणी मस्ती 1 ते 7 ह्यो बाल गितांच्यो सिडी प्रकाशीत केल्यात. तशेंच 16 जानेरा आनी नमस्कार भारता ह्यो गोंयच्या मुक्ती चळवळीचेर आदारीत सिडी उजवाडायल्यात. माणकुल्यांचीं कवनां सिडी आनी पुस्तक रुपांत प्रकाशीत केल्यांत. त्या भायर, व्यक्तिचित्रणां, म्हायती पुस्तिका, सुविचार, रस्तो नाट्य, काणयांचीं पुस्तकां प्रकाशीत केल्यांत. हीं सगळीं प्रकाशनां ‘पेटूल’ कार्यावळी वेळार प्रदर्शन आनी विक्री खातीर उपलब्ध आसतलीं.
