जेश्ठ पत्रकार आनी लेखक अनंत साळकार हांकां 9 ऑक्टोबराक मरण आयलें. फाटल्या सप्तकांत तांचो अपघात जाल्लो आनी तांचेर गोंय वैजकी महाविद्यालयांत उपचार चलताले.
अनंत साळकार हांचे पत्रकारितेच्या मळार भोव मोलाचें योगदान आशिल्लें. सुनापरान्त दिसाळ्याचे संपादक म्हणून तांणी काम केलां. ते उपरांत लोकमत ह्या दिसाळ्यांत तांणी काम केलां आनी सद्या ते गोमन्तक दिसाळ्यांत काम करताले.
साहित्याच्या मळारूय तांचें भोव मोलाचें योगदान आशिल्लें. ते एक उत्कृश्ठ कवी तशेंच ललीत निबंद लेखक. कसल्याच प्रकाश झोतांत येनासतना ते आपलें लिखाण करीत रावले. वेगवेगळ्या खबरापत्रांनी विंगड विंगड विशयांचेर तांचे लेख छापून आयल्यात. आपलें साहित्य मात तांणी खूब कमी प्रमाणांत उजवाडाक हाडलें. तांणी एकांकीका, गझल अशा प्रकारांतय लेखन केलां.
अनंत साळकार हांच्या मरणान एक बरो पत्रकार आनी लेखक ह्या संवसाराक अंतरला. कोंकणी भाशा मंडळ, गोंयान तांकां आर्गां ओंपल्यांत. तांचें मरण हें एकंदर साहित्यीक मळार पोकळी निर्माण करून गेलां, अशें मंडळाचे वतीन उजवाडायिल्ल्या प्रसिद्धी पत्रकांत मंडळाची अध्यक्ष अन्वेषा सिंगबाळ हांणी म्हणलां.
