ममता वेर्लेकारा भितर आशिल्ली संवेदनशिलताय ताच्या कवितांनी उक्ती जाता. ताका सामाजीक जाणविकाय आसा आनी ताचें अफाट वाचन आसा. ताकाच लागून ताच्यो कविता उंचेल्या दर्ज्याच्यो जातात, अशें कोंकणी भाशा मंडळाची अध्यक्ष अन्वेषा सिंगबाळ हांणी म्हणलें. तरणाटे कवी ममता वेर्लेकार हाचो ‘धग’ हो पयलो कविता झेलो कला आणि संस्कृती खात्याच्या भोव उद्देशीय सभाघरांत लोकार्पीत जालो. त्या वेळार ती उलयताली.
ह्या वेळार मानाचे सोयरे म्हूण शणै गोंयबाब भास आनी साहित्य स्कुलाचे उप-डीन आनी नामनेचे साहित्यकार डॉ. प्रकाश पर्येंकार आनी सँट झेवियर्स महाविद्यालयाच्यो हिंदी सहाय्यक प्राध्यापक आनी ढाई आखर गोवाची संस्थापिका डॉ. रमिता गुरव उपस्थित आसली. गोंय विद्यापीठाच्या शणै गोंयबाब भास आनी साहित्य स्कुलाचे सहयोगी प्राध्यापक आनी लेखक डॉ. हनुमंत चोपडेकार हांणी पुस्तकाचेर उलोवप केलें.
लेखकाक सामाजीक जाणीव आसप आनी आपल्या भोंवतणी कितें चल्लां हें खबर आसप भोव गरजेचें अशें सिंगबाळ हांणी फुडें उलयतना म्हळें. तो तें दर फावट साहित्यान उतरोवंक शकलो ना तरीय ताचे पाय जमनीर उरपाक हें महत्वाचें. लेखक हो सदांच हेरांक दिसता ताचे पेक्षा वेगळें पळयता आनी तशें करपाक शकलो जाल्यारूच तो स्वताक लेखक म्हणपाक शकतलो. आयच्या काळांत आमकां बरें साहित्य आनी विचार प्रसारीत करपाची गरज आसा. आमी लेखक म्हणून हे करपाक फाटी रावतात आनी ताका लागून चुकीचे विचार आनी साहित्य जे मोठ्या प्रमाणांत प्रसारीत जाता, ते समाजांत तग धरपाक पावता. कोंकणी साहित्य वैश्वीक स्थरार पावपाक ममता सारकिल्ल्या भोवभाशीक तरणाट्यांनी अनुवाद मळारय काम करचें, अशी आस्त सिंगबाळ हांणी फुडें उलयतना उक्तायली.
ममताच्या कवितांतल्यान आत्मसोदाची सुलूस लागता. ल्हान वयांत ताच्या कवितांनी परिपक्वताय दिसता. ताचे वाचन आनी आकलनांतल्यान ताच्यो कविता वेल्या पांवड्यार आसात. ताच्या कवितांतल्यान ते देशांतल्या सामाजीक तशेंच राजकी परिस्थितीचेर लेगीत बडी मारता आनी प्रस्न उबे करता, अशें डॉ. हनुमंत चोपडेकार हांणी ममताच्या पुस्तकाचेंर उलयतना व्यक्त केलें.
ममताच्या पुस्तकांतल्या 54य कवितांनी समाजांत चलिल्ल्या अन्याया आड एक तिडक दिसून येता. ते अस्वस्थ जाता आनी तातूंतल्यान ताका कविता स्फुरतात. ह्या पुस्तकाचें शिर्शक ‘धग’ आपल्या काळजाक खूब लागीचें म्हणून सांगतनाच डॉ. प्रकाश पर्येंकार हांणी ह्या पुस्तकांतल्यो कविताय कश्यो वाचकाक उब दितात हाचेर भाश्य केलें. अस्वस्थ मनांतल्या परश्यांत विचारांचे कोळशे पेटपाक लागतकर मौनाचो धुंवर आनी विद्रोहाचो धग ममताच्या कवितेंत चित्रीत जाता. हें कोंकणी कवितेच्या मळार एक सक्षम पावल आसा, अशें तांणी फुडें उलयतना म्हणलें.
ममता सारकेल्ले विद्यार्थी मेळप म्हणल्यार एका शिक्षकाचें भाग्य अशें डॉ. रमिता गुरव हांणी उलयतना म्हणलें. ममता भितर उपाट सृजनशिलता आसा आनी ते सदांच शिकत रावता अशें तांणी म्हणलें. आपल्यो कविता आयज मेरेन आपल्या डायरेंत लिपील्ल्यो आशिल्ल्यो. त्यो छापतलें अशेंय आपणे चितूंक नासलें. मात आपल्या इश्टांनी आनी ढाई आखर संस्थेच्या वांगड्यांनी दाखयल्ल्या विश्वासाक लागून आपणे ह्यो कविता प्रकाशीत केल्यो. आमच्या भोंवतणी एक काळोख तयार जाला आनी तो आमकां गिळून उडयतलो कसो आपल्याक भंय दिसता. ताचे विशयीं बरोवप हें आपूण आपली जबाबदारी समजता, अशें ममता वेर्लेकारान ह्या वेळार उलयतना म्हणलें.
ह्या कविता झेल्याक गोंवा कोंकणी अकादेमीच्या ‘पयलो चंवर’ ह्या येवजणे खाला आर्थिक पालव मेळ्ळा. हो सुवाळो ढाई आखर गोवा ह्या संस्थेन घडोवन हाडलो. सुवाळ्याचें सुत्रसंचालन प्रेरणा पालेकर हांणी केलें.
