‘उदक लेगीत जाल्लें रगत आनी रगत जाल्लें हून, भावा तुका याद आसा १८ जून?, ‘ आग्वादाच्या शीवां ‘, ‘ हांसती फुलां, धोल रें पानां, कितली खुशीं माझ्या मनां ‘, ‘ मोगा तुका याद आसा ‘, ‘ मळब पिशा सुकण्या पिलां ‘ अशी एका परस एक बेसबरी आनी सरस अशो मनोहरराय सरदेसाय हांच्यो रचना सादर करून गोंयच्या दिग्गज गायक कलाकारांनी गोंयचें एक ज्येष्ठ कोकणी कवी मनोहरराय सरदेसाय हांच्यो यादी ताज्यो केल्यो. मडगाव हांगा जाल्लो हो रंगारंग कोकणी गीतांचो कार्यक्रम कोकणी भाशा मंडळ हें संस्थेन आयोजित केल्लो.
कोंकणी भाशा मंडळ, गोंय संस्थेचें वतीन आयोजित ‘ लोककवी मनोहरराय सरदेसाय… एक याद!’ हो कार्यक्रम गीत संगीताची एक सोबित आनी सुंदर अशी सांज थारली, तशेच गौतमी हेदे कामत बांबोळकार, अक्षय नायक आनी लक्ष्मण नायक हें दिग्गज गायकांनी मनोहरराय हांची वीररस, शृंगाररस, देशभक्ती, गोंयचो मोग, रोमँटिक, भावनिक, भावगीत, सैमिक तशेच सामाजिक जाणविकाय आनी जागृताय करपीं गीतां सरदेसाय हांचेच अष्टपैलू तांकीत वा ताकदीन सादर करून सरदेसाय हांच्यो यादी ताज्यो केल्यो. गोंयचे इतिहासात जावन गेल्ल्या एका ‘ सुपरस्टार ‘ कवी आनी साहित्यिकाची झणझणीतपणान याद करून दिवपी हें कार्यावळीत सुत्रनिवेदन करपी नामनेचें रंगकर्मी अनंत अग्नी आनी मानसी च्यारी हांचे सयत वाद्यां वाजोवपी आशिष रायकर (कि बोर्ड), दीपक सावंत (ड्रम), सोनम कोचकर (हॅण्डसोनिक ), अँथनी डायस (बेस गिटार), रोहित बांदोडकार (तबला), मनोज फोंडेकार (आवाजां येवजण ) आनी अरविंद पोळेकार (उजवाडा येवजण ) हाणी बी साबार अशी साथ दिली.
कार्यावळीचें सुरवातेक मनोहरराय हांचे तसबीरीक कोकणी साहित्यिक उदय भेंब्रे, कोकणी भाशा मंडळाच्यो उपाध्यक्ष रत्नमाला दिवकार, सचिव मंगलदास भट आनी भांडारी पुरुषोत्तम वेरलेकार हांचे सयत सर्गेस्त सरदेसाय हांचे घरची, उमेश सरदेसाय, सुनील सरदेसाय आनी माया सरदेसाय हें मानेस्तांनी फुलां अर्पण करून आर्गां ओपली.
तरे तरेचे गीतांनी रंगली कार्यावळ
सोबित आमचे गोंय, मळब पिशां सुकणे, हासती फुलां, आग्वादाच्या शींवां, ल्हारां ल्हारां, तू आयलोना, हांव जाणा, १८ जून, सोबित कितले हरण भांगराचे हीं गीतां सादर करून अक्षय, लक्ष्मण आनी गौतमी हाणी गोमंत विद्या निकेतनाचे सभाघरात सरदेसाय हांच्या गीतांचे रंग भरले आनी वातावरण ‘ मनोहर ‘ मय करून सोडले.
रवींद्र केळेकार ज्ञानमंदिर शाळेतल्या माणकुल्या भुरग्यांनी मनोहरराय हाणी रचिल्ली बडबडगीतां आनी बाल कविता सादर करून सरदेसाय हाणी भुरग्यांचे भावविश्व बालगीतांनी कशे गिरेस्त केल्ले हाचो अणभव नवे पिळगेक करून दिलो. कोण खंयचें तू, कशे पावले गो हांगा (तुजे विणे), मोगा तुका याद आसा, पाचवी चोळी मिरगाची (अल्बम – तुजे विणे) अशी मनोहरराय हाणी नव्या दमाच्या गायक आनी संगीतकारांच्या संगीत अल्बम हांचे लागून बरयल्ली गीतां, बॉलिवूड, रॉक आनी पॉप गायकीची पकड आशिल्ले लक्ष्मण नायक आनी गौतमी हेदे हाणी सादर करून मनोहरराय हे एक अष्टपैलू वा ” व्हार्सेटाईल” गीतकार कशे आशिल्ले हो गजाल अधोरेखित करून गेले. रामाचें भक्तीन ओपिल्लें ‘ जोवर मळबांत चंद्र तारे, तशीच तोवर रामकथा ‘ हे गीत गोवन आयडल हो खिताब जिकलेले अक्षय नायक हाणी सादर करून कार्यावळीक एका वेगळ्याच उंचेल्या पावंड्यार व्हरून दवरलें.
निमणे खिणाक अक्षय, लक्ष्मण आनी गौतमी हाणी ‘ गोंयच्या म्हज्या गोंयकारांनो ‘ हें सामाजिक जागृताय करपी गीत सादर करून हाजीर आशिल्ल्या संगीत आनी मनोहरराय हांचे चाहत्यांक एका उंचेल्या भावनिक थराचेर व्हेले आनी संगीत कार्यावळीची सुंदर आनी सोबित अशी सांगता केली. मडगावकार प्रेक्षकांनी ताळीयों, शिट्यो आनी अपुरबायेच्या उतरांनी दिल्ली उत्स्फूर्त दाद आनी केल्ली तोखणाय गायक कलाकार हांचे सयत सुत्रसंचालकांचे आनी वाद्यवृंदाचे पंगड हांची ऊर्बा आनी उमेद वाडोवपी थारलीं, हें मुजरत नमूद केल्यार अतीताय जांवची ना.
🖋
(सनतकुमार फडते)
