फिल्म निर्माण करतना टीमवर्क वा सांघिक कार्य, चलतचित्र दृश्यांची विभागणी करप, कॅमेऱ्याचें लेन्सिंग तशेच परवडपा सारकें बजेट अशो साबार गजाली गरजेच्यो आसतातुच, पुण तेच बराबर लघुपट वा सिनेनिर्मिती करपी मनशाचो प्रामाणिक हेतू हो बी एक खूब म्हत्वाचो घटक आसता, अशे प्रतिपादन लघुपट निर्माते, दिग्दर्शक आनी गोंयची शॉर्ट फिल्मां आंतरराष्ट्रिय थाराचेर व्हरपी सिनेकर्मी साईनाथ उस्कईकर हाणी फोंडे हांगा उलयतना केले.
फोंडे हांगा आशिल्ल्या ‘ मॅजिक मूव्हीज ‘ हे सिनेमाघराचे इमारतीत कार्यकारी सभाघराचें आवारात “कला टॉक्स” हें उपक्रमातले दुसरें व्याख्यान हालीच जाले. ” तुमची पयली शॉर्ट फिल्म कशी तयार करप?” असो विशय हें व्याख्यानाचो आशिल्लो. उस्कईकर हाणी अभियांत्रिकी म्हाविद्यालयात शिकतनाचे जिवीत हांगच्यान टाटा इन्स्टिट्यूट ऑफ सोशल सायन्सेस हांगा पावप आनी उपरांत फिल्म इन्स्टिट्युट ऑफ इंडिया हें संस्थेत शिकतना तयार केल्लो पयलो लघुपट आनी ताचे उपरांत फिल्म मेकर म्हूण लोक कशे आपल्याक वळखपाक लागलें हांगा मेरेनचो प्रवास प्रेक्षकांचे फुडल्यान दवरलो.
“वाग्रो” हो लघुपट कसो तयार जालो, लघुपट तयार करपाचो प्रवास कसो आशिल्लों, कश्यो अडचणी आयल्यो, केल्ली मेहनत सिनेमा प्रदर्शित केल्ल्या उपरांत आनी तरेतरेचे महोत्सवांनी आंतरराष्ट्रिय आनी देशाचे पावंड्याचेर गेल्या उपरांत कशी फळाक आयली, हें ताणी आपले हलक्या फुलक्या शैलीत आनी काय विनोदी प्रसंग सांगून प्रेक्षकांक खिळोवन दवरलें. टाटा इन्स्टिट्यूट संस्थेतलो अभ्यासक्रम अर्धवट सोडून ” ड्रॉप आऊट” म्हूण भायर येयले उपरांत सिनेमा निर्मितीकडेन वाटचाल सुरू जाली.
अपूर्व आनी संग्रामसिंह पाटील हें सिनेमा क्षेत्राकडे संबंधित व्यक्तिमत्त्वां मेळटगित सिनेमा हे कलेंविशीं पळोवपाचो आनी शिकपाचो नवो आयाम मेळो हें सांगतना तांचेकडेन काम करपाची संद, “लाईक हिम, लाईक हर” हो पयलो लघुपट करतनाचे अनुभव आनी प्रक्रिया हांचेविशीं सुंदर पद्धतीन सांगतना वाग्रो लघुपट तयार करतना घडलेले अनुभव विनोदी शैलीन सांगून उस्कईकर हाणी सिनेमामोगींचे चेहऱ्याचेर हास्य फुलयलें. दिग्दर्शक हाणें आपली कमकुवत बाजू समजून घेवची.
कॅमेऱ्याच्यों हालचाली, संपादन आनी आवाजां येवजण हांचेविशी बरेच मुद्दे प्रभावी पद्धतीत उस्कईकर हाणी मांडले. युवा लघुपट निर्माते हांचेसयत गोंयचे नामनेचे सिनेनट आनी सिनेदिग्दर्शक संग्राम पाटील, अभिनेते आनी दिग्दर्शक राजेश कारेकार, नाटय कलाकार तशेच फिल्म अभिनेतों मंदार जोग हांचे बराबर वाग्रो सिनेमाचे कलाकार हे वेळार हाजीर आशिल्लें. कला टॉक्स हे संघाच्यो समन्वयक प्राजक्ता कवळेकर हाणी कार्यक्रमाचे सूत्रसंचालन केले. लघुपट आनी सिनेमोगी हांचे सयत जायते नाटय कलाकार हें वेळार कार्यक्रमाक हाजीर आशिल्ले.
🖋
(सनतकुमार फडते)
