पुणे निगडी वाठारांत जावपी 34 व्या अखिल भारतीय कोंकणी अधिवेशना वेळार, कोंकणी साहित्य वा संशोधनाच्या पुस्तकाचें विमोचन करपाची संद अखिल भारतीय कोंकणी परिशदेन दिल्या. 2026 वर्साचें नव्यान प्रकाशीत जाल्लें हें पुस्तक आसूंक जाय. कथा, कविता, निबंध, सोद-वावर अश्या स्वरुपांतलें पुस्तक आसूं येता. पुस्तकाच्यो 10 प्रती (गिफ्ट पॅक करिनासतना) पुस्तक विमोचना खातीर परिशदेक 14 नोव्हेंबराक सकाळीं 9.00 वरांचेर स्नेहा सबनीस हांकां दिवच्यो पडटल्यो.
अधिवेशनाक पुस्तक विमोचीत करूंक सोदतल्या लेखनांनी वा प्रकाशकांनी परिशदेची सरकार्यदर्शी स्नेहा सबनीस (9923633789) हांकां संपर्क करचो. 11 नोव्हेंबर 2026 दिसा सांजे 5 वरां मेरेन पुस्तकाची सविस्तर माहिती दिवची अशें सरकार्यदर्शी स्नेहा सबनीस हांणी मागलां.
मजगतीं, अधिवेशना खातीर नांव-नोंदणी करपाची मुदत परिशदेन वाडल्या. अजून कोणें नांव-नोंदणी करूंक ना, तांकां 5 नोव्हेंबर 2026 दिसा मेरेन नांव-नोंदणी करपाक मेळटली अशें परिशदेचे कार्याध्यक्ष चेतन आचार्य हांणी सांगला. घरच्यां वांगडा परिशदेक येतात तांणी प्रत्येकान नांव-नोंदणी करपाक जाय. रावपाची वेवस्था, आयडी-कार्डां, जेवणाची वेवस्था, बॅगांची वेवस्था करपाक हो आंकडो जाय पडटा. ते खातीर, जाता तितले बेगीन, अधिवेशनाक येवपी दर एकल्यान नांव नोंदणी करची अशें आवाहन चेतन आचार्य हांणी केलां.
अधिवेशना खातीर नांव-नोंदणी केल्या, तांकां अधिवेशनाची माहिती मेळची म्हणून एक वॉट्सएप ग्रूप तयार केला. ह्या ग्रुपांत, राबित्याची वेवस्था, बसीची वेवस्था, पुणे दर्शन हे विशींची सगळी माहिती मेळटली. जांणी आपली ई-मेल आयडी दिल्या तांकां वॉट्सएप ग्रुपाची माहिती तांचे ईमेलीचेर मेळटली अशें स्नेहा सबनीस हांणी सांगलें.
