कोरोना महामारीन संवसारभर धुमशेणां घातल्यात. हाका लागून मनीसकुळाचें लुकसाण जालेंच. पूण कांय प्रमाणांत फायदोय जालो. कोंकणी भाशीक मळार कार्यरत आशिल्ल्या वावुरप्यांनी तर हाचो बरो फायदो करून घेतलो. कोविडाच्या निमतान जरी जायना, कोंकणी भाशेक एक डिजीटल व्यासपीठ मेळ्ळें. ह्या वावरांत जायत्यो संस्था सक्रीय आसात हातूंत दुबाव ना. हातूंत मुखेलपणान नांव घेवपा सारकें तें कोंकणी भाशा मंडळाचें.
कोंकणी भाशा मंडळान 8 सप्टेंबर 2020, ह्या दिसा म्हळ्यार “आंतरराष्ट्रीय साक्षरताय दिसा” निमतान ‘कोंकणी वाचन विश्व’ हो उपक्रम सुरू केलो. हो उपक्रम युवकांक आनी खासा नवोदीत लेखकांक जायत्यो संदी उपलब्द करून दिता. साहित्यीक चर्चा, लेखकांच्यो मुलाखती, पुस्तकाचें परिक्षण हे तरेच्यो साबार कार्यावळीं मंडळ घडोवन हाडटा. ह्या उपक्रमाचें आनीक एक खाशेलपण म्हळ्यार कार्यावळींचीं पुराय सुत्रां सांबाळपी तरनाटे आसतात. तांकां ह्या वावरांत मार्गदर्शन मेळटाच. मात स्वता कार्यवळीची सुत्रां सांबाळपाची संद तांकां मंडळ दिता. तरणाट्यां मदीं वाचनाची आवड निर्माण करपी तशेंच तरनाट्यांक आपले विचार व्यक्त करपा खातीर एक व्यासपीठ दिवपी हो पयलोच सातत्यान चलपी उपक्रम अशें म्हाका दिसता. ह्या उपक्रमाक सुमार एक वर्स पुराय जायत आयलां आनी आयज लेगीत त्याच उर्बेन हो उपक्रम मळबाक हात घालतां. दर म्हयन्याक आगळ्यो वेगळ्यो साहित्यीक कार्यावळीं ह्या उपक्रमा अंतर्गत घडोवन हाडटात.
युवकां मदीं सतत उर्बेची कीट पेटोवपी कोंकणी भाशा मंडळाची अध्यक्ष भौ. अन्वेषा सिंगबाळ आनी तांच्या ह्या वावरांत सहकार्य दिवपी भौ. स्नेहा सबनीस, तशेंच ह्या सगळ्या कार्यावळींचो तांत्रीक भार सांबाळपी भौ. पलाष अग्नी हांचे खरें म्हळ्यार उपकार मानता तितलें कमी. तरनाट्यांक फुडें काडटासताना तांकां उर्बा दिवपाची कळाशी तांकां जुस्ताजुस्त फावो जाल्या. मुळांत ह्या उपक्रमांत वावुरपी असंख्य हात एका कुटुंबाचे, गोंयच्या कोंकणी कुटुंबाचे. देखून कार्यावळी जरींय ओपचारीक स्वरुपाच्यो आसल्यो तरीय तातूंत वावुरतल्यांक तशेंच आस्वादकांक आपलेंपणाचींच उब मेळटा.
“आयची युवा पिळगी कांयच वाचन करिना”,. असो सरळ आरोप करपी लोकांच्या तोंडाक हो उपक्रम म्हळ्यार एक कुलूप. आयचो युवा हुशार आसा. ताचे वाचन मर्यादीत ना. मुळांत तरनाटो फक्त वाचिना तर साहित्य निर्मणेंत आपलें मोलादीक योगदान दिता. हें लागीं-लागीं ह्या उपक्रमाच्या माध्यमांतल्यान सिध्द जाता. वाचन संसकृतींतल्यान नवोदीत लेखक, कवी, अभ्यासक, समिक्षक आनी विचारवंत घडोवपांत कोंकणी वाचन विश्वाचो हो वावर क्रांतीकारी आसा ही नोंद घेवपा सारकी गजाल.
कोंकणी वाचन विश्वाचो प्राण म्हळ्यार शिंवशिवत्या रगताचे तरणाटे. हांव ह्या गटांत आस्पावता देखून स्वताच्योच बडायो मारता अशें कांय जाणांक दिसूं येता. मात केल्ल्या कामाची नोंद घेवन, वावुरतल्यांक उर्बा दिवप तितलेंच गरजेचें. आमचे कडल्यान कितल्योशोच चुको जाल्यात आसतल्यो. पूण आमी थांबलीं नात. जाणकारांनी पावलां कणकणी आमची समजूत काडली, आमकां योग्य मार्गदर्शन दिलें, आमकां उर्बा दिली. आनी तांच्या बळग्यार आमी फुडें सरलीं.
सुरवातेक गुगल फॉर्मांवरवीं 300 लोक जोडिल्ले आनी आयज सुमार 800 लोकांचो प्रतिसाद ह्या उपक्रमाक मेळ्ळा. तशेंच युवा पिळगी मुखार सरून कोंकणी भाशेच्या विकासा खातीर वावुरताना पळोवन जाणकार कौतूक करून उर्बा वाडयताना दिसतात.
कोंकणी भाशेचे अभ्यासक, ज्येश्ट साहित्यकार, शिक्षक तशेंच विद्यार्थ्यांच्या प्रयत्नांतल्यान हो उपक्रम अदीक घटमूट जालां. आनी दिसान-दीस ताका घटाय मेळत आसा. कोंकणी भाशेचीं बियां आयज ऑनलायन मळार प्रखरपणान चंवरता आनी हें पळोवन कोंकणी मनश्याचें मन प्रफुल्लीत जाता. आनीकूय युवकांनी ह्या उपक्रमांत वाटेंकार जावंचें आनी हो उपक्रम असोच परमळचो हीच आस्त.
प्रणिता प्रताप रेडकर
हडफडे बार्देस, गोंय.
7507354542
