ज्येश्ठ साहित्यीक रजनी अशोक भेंब्रे हांकां सोमारा मरण आयलें. कुडचडेंच्या सर्वोदय एज्युकेशन सोसायटीच्या हायस्कुलांत वट्ट 34 वर्सां शिक्षक म्हणून तांणी शिक्षादान केलां. उपरांत स्वता जावन निवृत्ती घेवन कोंकणी साहित्य निर्मिणीचो वावर तांणी केलो.
घुस्मट, नियतीची आशाढ पांवळी हे कथा संग्रह, मोराची करामत, पांच पाकळ्यो, हांव कोण?, आळ, झांशीची राणी, अडेचो वेगळोचार, पांच एकांकी सारकिलीं हीं बाल साहित्याचीं पुस्तकां, भुरग्यांक शिक्षणा खातीर उपेगी पडपी कोंकणी निबंध, हांणी घडयलें गोंय, फाकिवंत गोंयकार, गोंयचीं माणकां सारकिलीं पुस्तकां तांणी बरयल्यांत. तांचीं आयजवेर सुमार तेवीस पुस्तकां प्रकाशीत जाल्यांत.
तांच्या ‘घुस्मट’ कथा संग्रहाक कोंकणी भाशा मंडळ गोंयचो साहित्य पुरस्कार फावो जाला. तशेंच समाज कल्याण खात्या वरवीं दिवपी गोंय राज्याचो यशदामिनी पुरस्कार, कला आनी संस्कृती संचालनालयाचो गोंय राज्याचो कला गौरव पुरस्कार, समाज कल्याण खात्याचो समाज सेवक पुरस्कार तांकां फावो जाला.
कोंकणी लेखक संघाचो पुरस्कार, कोंकणी भाशा प्रचार सभा कोचीचो सरस्वीत बाल साहित्य पुरस्कार, कोंकणी कला साहित्य केंद्राचो रामनाथ मथा बालसाहित्य पुरस्कार, सांगें केपें पत्रकार संघाचो नरहरी वळवईकर स्मृती पुरस्कार अशे हेर पुरस्कार तांकां लाभल्यात.
कोंकणीच्या भाशीक, साहित्यीक, सांस्कृतीक वावरांत तांचें भोव मोलाचें योगदान आसा. बायलांच्या समाजीक चळवळींनी वांटेकार जावन बायलांच्या समाजीक दर्जाक उंचाय दिवपाखातीर आनी तांच्या कलागुणांक संद दिवपा खातीर पणजी आकाशवाणी आनी पणजी दुरदर्शनावेल्यान बायलांच्या कितल्याश्याच कार्यावळीचें तांणी सादरीकरण केलां.
कोंकणी भाशा मंडळा वरवीं शणै गोंयबाब कथामाळेच्या आयोजनांत निमंत्रक म्हणून तशेंच मंडळाच्या हेर कार्यावळींनी तांचो क्रियाशील वांटो आसलो. अखिल भारतीय कोंकणी परिशदेच्या 20व्या अखिल भारतीय कोंकणी साहित्य संमेलनांत बाल साहित्याचेर तांणी सोद निंबद सादर केल्यात. मार्ग अभियानाच्यो त्यो सक्रिय वांगडी आशिल्ल्यो. नवी दिल्लीच्या साहित्य अकादेमीच्या आदल्या सल्लागार समितीच्यो त्यो वांगडी आसल्यो.
रजनीताई भेंब्रे हांणी कोंकणी भास आनी साहित्य खास करून बालसाहित्य मळार भरीव काम केलां. तांचें कोंकणी भाशे खातीर खूब व्हड योगदान आसा अशें म्हणत कोंकणी भाशा मंडळाची अध्यक्ष अन्वेषा सिंगबाळ हांणी रजनी भेंब्रे हांकां आर्गां ओंपल्यांत.
