कोंकणी भाशा मंडळान वसंतराव धेंपो उच्च माध्यमीक विद्यालयाच्या जोडपालवान आयोजीत केल्ल्या 17व्या राधा मुकूंद नायक वक्तृत्व सर्तींत मडगांवच्या दामोदर उच्च माध्यमीक विद्यालयाच्या संस्कृती सावंत देसायाक पयलें इनाम फावो जालें. दुसरें इनाम डि.एम.बी उच्च माध्यमीक विद्यालयाच्या मुस्कान छप्परबंद हाका जाल्यार तिसरें इनाम डॉ. के बी हेडगेवार उच्च माध्यमीक विद्यालयाच्या शौनल सातोस्कार हाका फावो जालें. हरमल पंचक्रोशी उच्च माध्यमीक विद्यालयाच्या सारा रॉड्रिगीस, सँट झेवियर्स उच्च माध्यमीक विद्यालयाच्या आर्यन आरोलकार आनी लॉयोला उच्च माध्यमीक विद्यालयाच्या सिमरन तारी हांकां उमेद वाडोवपी इनामां फावो जालीं.
सर्तींत गोंयभरच्या उच्च माध्यमीक विद्यालयांचे 41 सर्तक वांटेकार जाल्ले. विद्या प्रबोधिनी महाविद्यालयाचे सहाय्यक प्राध्यापक कुलदीप कामत, गोंय विद्यापीठाच्या आंतरराष्ट्रीय संबंद विभागाचे सहाय्यक प्राध्यापक युगांक नायक आनी टायम्स ऑफ इंडियाच्यो जेश्ठ पत्रकार गौरी मळकर्णेकार हांणी सर्तीचें परिक्षण केलें.
इनामां भेटोवपाच्या सुवाळ्याक जेश्ठ लेखक आनी समाज वावुरपी भौ. शैलेंद्र मेहता हजर आशिल्ले. वक्तृत्व म्हळ्यार प्रेक्षकां कडेन सादिल्लो संवाद. तो सादतना प्रेक्षकांच्या दोळ्यांत दोळे घालून उलोवपाक जाय. आयज विद्यार्थ्यां कडेन तंत्रज्ञानाक लागून साबार सादनां उपलब्द आसात. तांचो वापर करून आपली वक्तृत्व कला अदीक बरी करात असो उलो तांणी ह्या वेळार विद्यार्थ्यांक मारलो. ह्या वेळार सर्तीचे पुरस्कर्ते आनी राधा मुकूंद नायक हांचे पूत सुभाश नायक, शरेंद्र नायक आनी प्रशांत नायक आनी वसंतराव धेंपो उच्च माध्यमीक विद्यालयाच्यो प्राचार्य भौ. सुरेखा केळकार ह्या वेळार हजर आशिल्ले.
कोंकणी भाशा मंडळाचे अध्यक्ष अन्वेषा सिंगबाळ हांणी मानेस्तांक येवकार दिलो. उच्च माध्यमीक विद्यालयाच्यो शिक्षक तुलसी पर्येकार हांणी मानेस्तांची वळख करून दिली जाल्यार शिक्षक अजय जोशी हांणी उपकाराचें उलोवप केलें. सर्तीचे संयोजन डॉ वेदिका वाळके हांणी केलें. मृगना सावयकार हांणी पुराय कार्यावळीचें सुत्रसंचालन केलें.
