कोंकणी भाशा मंडळान हालींच गोंयचे राज्यपाल भौ. पी. एस. श्रीधरन पिल्लई हांची भेट घेवन कोंकणी भास, शिक्षण आनी हेर संबंदीत विशयांचेर जाहीरनामो भेटयलो. गोंयांत राजभास कायद्याची अंमलबजावणी जावची तशेंच हेर क्षेत्रांत कोंकणी भाशेक प्राधान्य दिवचें ह्या संबंदान मंडळाच्या वांगड्यांनी राज्यपालां कडेन चर्चा केली. कोंकणी ही गोंयकारांची मांयभास आनी तिका प्राधान्य मेळपाकूच जाय अशें ह्या वेळार राज्यपालान म्हणलें. आपूण ते खातीर जमता तो आदार करतलो अशें आश्वासनूय ह्या वेळार राज्यपालान दिलें. गोंयांत कोंकणी विशीं चालू आशिल्ल्या कामाची राज्यपालान आस्थेन चवकशी केली.
मंडळाच्या वांगड्यांनी फाटले कांय दीस गोंयांतल्या सगळ्या राजकी पक्षांच्या पदाधिकार्यांची भेट घेवन तांकां हो कोंकणी खातीरचो जाहीरनामो भेटयलो. वेंचून आयिल्ल्या पक्षाच्या सरकारान ह्या जाहीरनाम्यांतल्यो सुचोवण्यो बेगिनात बेगीन चालीक लावच्यो अशी मागणी मंडळान केल्या. राजभास कायदो, शिक्षण, केंद्रीय येवजण्यो, भास, संस्कृताय, संस्था अश्या वेगवेगळ्या विशयांचेर ह्या जाहीरनाम्यांत सुचोवण्यो आसात.
कोंकणी भाशेक लागूनच गोंय राज्य जालें. ते नदरेंतल्यान सरकाराची कोंकणी भाशे खातीर लागूणक आसपाकूच जाय. गोंय सरकारान 4 फेब्रुवारी 1987 दिसा राजभास कायदो पास केलो. ह्या कायद्या खाला कोंकणी भाशेक गोंयचे राजभाशेचो दर्जो दिला. ते नदरेंतल्यान सरकारी पातळेचेर सगळे वेव्हार कोंकणींतल्यान जावपाक जाय. फाटलीं कितलींशींच वर्सां गोंय सरकारान राजभास चालीक लावपाचे नदरेंतल्यान भोव म्हत्वाचीं पावलां उबारल्यांत. मात ताका गती दिवपाक सरकार सदांच अपेशी थारलां. भाशेच्या विशयाचेर सगळ्या सरकारांनी सदांच आडनदर केल्या आनी ताका लागून सरकारी पांवड्यार कोंकणीक अजूनय फावो तो मान मेळना. सरकाराचें राजभाशा संचालनालय सशक्त करपाचे नदरेंतल्यान सरकारान पावलां मारचीं. राजभाशा संचालनालयाच्यो सगळ्यो येवजण्यो प्रभावी रितीन चालीक लागच्यो अशें मंडळान ह्या जाहीरनाम्यांत म्हणलां.
शिक्षण क्षेत्रांत सरकारान कोंकणी भाशेक सगळे तरेचें फाटबळ दिवपाक जाय. कोंकणी माध्यमांतल्या शाळां खातीर आयिल्ल्या सगळ्या अर्जांक परवानगी दिवची. तशेंच तांकां मराठी माध्यमांतल्या शाळां कडल्यान ना हरकत दाखलो हाडपाची पद्धत सरकारान रद्द करची. सगळ्या तालुक्यांनी मुळाव्यो शाळा सुरू करपाक सरकारान कोंकणी भाशा मंडळाक सुवात आनी परवानगी दिवची. तशेंच नव्या राष्ट्रीय शिक्षण धोरणाक अनुसरून सरकारान मुळावें शिक्षण कोंकणींतल्यान जावचें म्हणून म्हत्वाचीं पावलां उबारचीं. शिक्षण क्षेत्रांतल्या तशेंच हेर सरकारी खात्यांनी खंयच्याय पदांचेर नियुक्ती जातना कोंकणी भाशेचें ज्ञान आसप सक्तीचें ह्या नेमाक खरपणान पाळो दिवचो अशें मंडळान म्हणलां.
कोंकणी साहित्य हेर भासांनी अनुवादीत जावचें हे नदरेंतल्यान एक अनुवाद/अणकार वेवस्था तयार जावची. हाका लागून कोंकणी साहित्य नेमान अनुवादीत जावन राष्ट्रीय थरार पावतलें. कोंकणी भाशेचो आसपाव भारताच्या संविधानाचे आठवे अनुसुचींत जालो आनी ते खातीर कोंकणी भाशेक राष्ट्रीय दर्जो मेळटनाच साबार म्हत्वाचीं दारां उक्तीं जालीं. मात ह्या केंद्रीय येवजण्यांचो लाव अजूनय गोंयाक मेळना. तो मेळोवपाक सरकारान यत्न करपाची गरज आसा. नॅशनल ट्रान्स्लेशन मिशन आनी सॅण्ट्रल इन्स्टिट्यूट फॉर इंडियन लँग्वेजीस हांचे कोंकणीचे फांटे गोंयांत आसचे. कोंकणी भाशेक एन.बी.टींत स्वतंत्र संपादक आसचो म्हणून गोंय सरकारान मागणी करची अशें मंडळान ह्या जाहीरनाम्यांत मागलां.
गोंय सरकाराच्या राजभास संचालनालया खाला आशिल्ल्यो सगळ्यो कोंकणी स्वायत्त तशेंच बिगर सरकारी संस्था सरकारान घटमूट करच्यो आनी तांकां सगळे तरेचो आदार दिवचो अशें मंडळान ह्या जाहीरनाम्यांत नमूद केलां. ते भायर गोंय मुक्ती दिसा फाटोफाट गोंयच्या इतिहासांत म्हत्वाचे आशिल्ले दीस मनोवपाची गरज मंडळान उक्तायल्या. अस्मिताय दीस वा जनमत कौल दीस, राजभास दीस, गोंय घटक राज्य दीस तशेंच कोंकणी राष्ट्रमान्यताय दीस हे दीस सरकारी पातळेचेर मनयतनाच शाळांनी ते मनोवपा खातीर परिपत्रक काडचें अशें मंडळान सुचयलां.
कोंकणी भास गोंयांत फुलतली जाल्यार सरकारी स्तराचेर ह्यो गजाली करप म्हत्वाचें आसा. तशें जाल्यारूच कोंकणी भास तिगून उरतली. वेंचून येवपी सरकाराचेर मंडळाची बारीक नदर आसतली. ह्यो सुचोवण्यो चालीक लागच्यो म्हणून मंडळ फाटपुरावो करतले अशें मंडळाची अध्यक्ष अन्वेषा सिंगबाळ हांणी सांगलें. हालींच मंडळाच्या फेसबूक पेजीचेर लायव्ह कार्यावळींत तांणी ह्या जाहीरनाम्यांतल्यो सुचोवण्यो सगळ्या मुखार दवरिल्ल्यो. ते उपरांत राज्यपालांक मेळून मंडळाच्या वांगड्यांनी चर्चा केली.
