साहित्यीक, धर्मीक वातावरणांतल्यान आयिल्लो बाकीबाब व्यक्ती म्हूण बेस बरो आशिल्ले. ते एक भारतीय कवी जाल्ल्यान भौसा मेरेन भौसाचे भाशेंत कविता पावोवप तांकां गरजेचें दिसलें. देखून ‘पांयजणां’, ‘सासाय’ सारके कविता संग्रह जल्माक आयले. आपणें आपली प्रकृती घेवन मुखार वचपाक जाय ह्या मताचे बाकीबाब आशिल्ले. सदांच कवितेक धरून ते जगले. बाकीबाब जर इंग्लंड सारक्या देशांत जल्मल्ले जाल्यार आज ते संवसारांतल्या म्हान विचारवंतांच्या पंगतींत बसतले आशिल्ले अशें जेश्ठ साहित्यीक आनी कवी माधव बोरकार हांणी म्हणलें.
कोंकणी भाशा मंडळ, गोंयान कोंकणी वाचन विश्वा अंतर्गत आयोजीत केल्ल्या ‘जेश्ठ कवी स. बाकीबाब बोरकार हांच्या कविता झेल्यांचेर चर्चा’ हे कार्यावळींत ते उलयले. बाकीबाबांच्या कवितेच्या प्रवासाचेर तांणी खोलायेन उजवाड घालो.
तशेंच शिक्षक सानिका च्यारी आनी सहाय्यक प्राध्यापक डॉ. रेश्मा खोलकार हांणी बाकीबाबाल्या दोनूय कोंकणी कविता झेल्यांचेर आपले विचार परगटायले. तांच्या कवितांच्या साबार आयामांची तांणी खोलायेन मांडणी केली. हे कार्यावळीचें संयोजन दिप्ती काकोडकार आनी गौरांग भांडीये हांणी केलें.
कोंकणी वाचन विश्वाची फुडली कार्यावळ ‘रेजीनाल्ड फेर्नांडीस हांच्या रोमांशींचेर चर्चा’ ह्या विशयाचेर 12 ऑगस्ट 2021 ह्या दिसा जातली. ह्या वेळार साहित्याक ग्वादालूप डायस मुखेल उलोवप करतली. तशेंच थॉमस स्टीफन्स कोंकणी केंद्राचे संचालक फा. जुझे सिल्वेरा एस. जे., शिक्षक अभिजीत पागी आनी विद्यार्थी जेनीस फर्नांडीस ह्या वेळार आपले विचार मांडटलीं. हे कार्यावळीचें संयोजन रिया बेंगलोरकार आनी खुशी प्रभुदेसाय करतलीं. ही कार्यावळ मंडळाच्या यू-ट्यूब चॅनलाचेर तशेंच कोंकणी वाचन विश्वाच्या फेसबूक पेजीचेर लायव आसतली.
