कोंकणी भाशा मंडळ, गोंयान आसगांवच्या ज्ञानप्रसारक मंडळ महाविद्यालयाच्या (डी.एम.सी) जोड पालवान आयोजीत केल्ले 16व्या राधा मुकूंद नायक वक्तृत्व सर्तींत पणजेच्या धेंपो उच्च माध्यमीक विद्यालयाच्या मृगना सावयकाराक पयलें इनाम फावो जालें. दुसरें इनाम कवळेंच्या श्री सरस्वती उच्च माध्यमीक विद्यालयाच्या निधी नायक हाका जाल्यार तिसरें इनाम पेडणेंच्या हरमल पंचक्रोशी उच्च माध्यमीक विद्यालयाच्या लार्या फर्नांडीस हाका फावो जालें.
वाळपयच्या सरकारी उच्च माध्यमीक विद्यालयाच्या निलांबुज ठाकुर, कवळेंच्या एस. एस. समिती उच्च माध्यमीक विद्यालयाच्या सर्वज्ञा पाटील तशेंच रोझरी उच्च माध्यमीक विद्यालयाच्या शर्वीन मायरन डायस हांकां उमेद वाडोवपी इनामां फावो जालीं. ही सर्त महाविद्यालयाच्या सभाघरांत हालींच जाली.
सर्तींत गोंयभरच्या उच्च माध्यमीक विद्यालयांचे 29 सर्तक वांटेकार जाल्ले. पर्वरीच्या विद्या प्रबोधिनी महाविद्यालयाचे सहाय्यक प्राध्यापक कुलदीप कामत, सांखळेच्या सरकारी महाविद्यालयाच्यो सहाय्यक प्राध्यापक सिद्धी गांवस आनी फोंडेंच्या जी. वी. एम्स दादा वैद्य शिक्षण महाविद्यालयाच्यो सहाय्यक प्राध्यापक अंतरा भिडे हांणी सर्तीचें परिक्षण केलें.
इनामां भेटोवपाच्या सुवाळ्याक ज्ञानप्रसारक मंडळ महाविद्यालयाचे प्राचार्य प्रो. डी. बी. आरोलकार हजर आशिल्ले. तशेंच सर्तीचे पुरस्कर्ते आनी राधा मुकूंद नायक हांचे पूत सुभाश नायक आनी प्रशांत नायक ह्या वेळार हजर आशिल्ले. कोंकणी भाशा मंडळाची अध्यक्ष अन्वेषा सिंगबाळ हांणी मानेस्तांक येवकार दिलो. महाविद्यालयाची उपप्राचार्या रष्मी रेडकार हांणी उपकाराचें उलोवप केलें. सर्तीचें संयोजन पुर्शोत्तम वेर्लेकार आनी पूर्वा गुडे हांणी केलें. महाविद्यालयाचें विद्यार्थी दिव्या पाटील हांणी कार्यावळीचें सुत्रसंचालन केलें.
